Ө.Рагчаасүрэн - Дархан-Уул аймгийн “ОРХОН” телевиз, радиогийн ерөнхий редактор, сэтгүүлч
Ардчилсан Орнуудын Хамтын Нийгэмлэгийг тэргүүлэх хариуцлагатай үүргийг Монгол Улс хүлээж авсан нь дэлхий дахины ардчилал, шударга ёсны өмнө нэр төрийн хэрэг боллоо. Тэр тусмаа Монголын ардчиллын билэг тэмдэг болсон Ерөнхийлөгч маань Ардчиллын хамтын нийгэмлэгийн тугийг гардан авсан нь бүр ч билэг дэмбэрэлтэй хэрэг. Литва Улсын Вильнюс хотноо болсон дэлхийн ардчиллын чуулганд оролцохоосоо хоёрхон долоо хоногийн өмнө Монгол Улсын ерөнхийлөгч Ц.Элбэгдоржийн, ардчиллын өлгий орон АНУ-д хийсэн айлчлал ч бас олон амжилтыг дагуулсан. Монголын ардчиллын буухиа ийнхүү хоёр долоо хоногийн турш өртөөлсөөр Вильнюст хүрэх нь энэ.
АНУ-ын ерөнхийлөгч Барак Обама ерөнхийлөгч Ц.Элбэгдоржийг хүлээж авч уулзахдаа “- Монгол Улс ардчилсан нийгмийг сонгосноос хойших хорь гаран жилийн богино хугацаанд хүний эрх, эрх чөлөөг хангаж, ардчиллыг бэхжүүлэн эдийн засгаа хөгжүүлэхэд олсон амжилтыг би гайхан биширч байдаг. Ерөнхийлөгч Таны улс төрийн тавцанд хэрхэн гарсан, шийдвэр гаргахад оролцож байсан, улс орноо удирдаж байгаа түүхийг би мөн бахархаж байна. Сүүлийн 22 жилийн турш залуу ардчиллынхаа үндэс суурийг бататгасаар буй монголын ард түмний ололт амжилтыг илтгэн 2011 оны 7-р сараас Ардчилсан орнуудын хамтын нийгэмлэгийг даргалах гэж буйд АНУ баяр хүргэе! ” гэсэн нь Монголын ардчиллыг ерөнхийлөгчтэй нь хамт давхар үнэлсэн үнэлэлт боллоо.
Юуны өмнө Ардчилсан Орнуудын Хамтын Нийгэмлэгийн даргын ажлыг Монгол Улс хүлээн авч байгаа энэ түүхэн үйл явдлын утга учир, ач холбогдлыг олон нийтэд мэдээлэх ажлыг өргөн хүрээнд хийх шаардлагатай болж байна. Ардчилсан Орнуудын Хамтын Нийгэмлэгийн үйл ажиллагаа, зорилго чиглэлийг танилцуулахаас энэ ажил эхэлнэ. Олон нийт энэ талаар ойлголт мэдлэг дулимагхан байна. Ганцхан Дархан-Уул аймгаар л жишээлж авч үзэхэд энэ байгууллагыг иргэд тэр тусмаа албан хаагчид, иргэний нийгмийн байгууллагын идэвхтнүүд, залуучууд, мэдээлэлд ойр байдаг идэвхитэй хүмүүс ч мэдэхгүй байв. Ийм учраас хэвлэл мэдээллийн байгууллагууд, сэтгүүлчид энэ талын мэдээллийг орон даяар шуурхай эхлүүлье. Саяхан Хэвлэлийн Хүрээлэнгийн Хойд бүсийн төвөөс санаачлан Вильнюсийн уулзалттай холбогдуулан Ардчилсан Орнуудын Хамтын Нийгэмлэгийн тухай мэдээллийг Дархан хотын сэтгүүлчдэд тоймлон өгч ярилцлага зохион байгууллаа. Үүнийхээ үндсэн дээр Дархан хотын “RGB”, “ЛХА”, “ТВ-12” ТВ-үүд, “ОРХОН” радио, “Дархан таймс” сониноор мэдээлэл нэвтрүүлж нийтэллээ. Орон нутгийн сэтгүүлчид бид үүнийгээ энэ ажлын зөвхөн эхлэл гараа гэж үзэж байгаа. Цаашид Ардчилсан Орнуудын Хамтын Нийгэмлэгийг Монгол Улс тэргүүлэх энэ хугацаанд хэвлэлийнхэн, сэтгүүлчдэд өөрсдөд нь энэ талын мэдээлэл илүү тодорхой хэрэгтэй болж байгааг энэ дашрамд дуулгая.
Ардчилсан Орнуудын Хамтын Нийгэмлэгийн цар хүрээ нь ардчиллыг бэхжүүлж, улс орнуудын нэгдмэл байр суурийг нэгтгэхийн төлөөх санаачилга биеллээ олж улам бүр хүчирхэгжсээр өнөөдөр 150 гаруй гишүүн орнуудыг нэгтгэсэн томоохон байгууллага болсноос илхэн харагдаж байна. АОХН-нь ардчиллыг дэмжин, ардчиллын хэм хэмжээ, ёс журмыг түгээн бэхжүүлэхэд улс орнуудын нэгдмэл байр суурийг баталгаажуулах зорилго бүхий Засгийн газар хоорондын байгууллага ажээ. АОХН-ийг 2000 онд Польшийн Варшав хотноо болсон Гадаад хэргийн сайд нарын анхдугаар бага хурлаар байгуулжээ. Анхдугаар бага хуралд оролцсон 106 орны төлөөлөгч “Варшавын Тунхаглал”-ыг баталсан байна. АОХН-ийн Байнгын нарийн бичгийн дарга нарын газар нь Варшав хотноо байрладаг.
АОХН-ийн бүрэлдэхүүнд Төрийн Бус Байгууллага болон иргэний нийгмийн төлөөллүүд багтдаг онцлогтой. Одоогоор иргэний нийгмийн 300 гаруй байгууллага элсэн орсны дотор манай улсаас Иргэдийн Альянс төв, Нээлттэй Нийгэм Хүрээлэн багтжээ.
Ардчилсан Орнуудын Хамтын Нийгэмлэг нь Вильнюст болсон энэ жилийн хуралдаанаа ”Эрчтэй, Идэвхтэй, Нээлттэй” гэсэн уриан дор зохион байгуулав. Монгол Улс 2011-2013 онд Ардчилсан орнуудын хамтын нийгэмлэгийг даргалах албыг хүлээн авч байгаатай холбогдуулан манайд Үндэсний Зөвлөл байгуулжээ. ҮЗ-ийн даргаар Монгол Улсын Ерөнхий сайд, дэд даргаар Гадаад харилцааны сайд, нарийн бичгийн даргаар ГХЯ-ны Төрийн нарийн бичгийн дарга нар ажиллаж байгаа юм байна. АОХН-тэй холбоотой асуудлаар ГХЯ-ны Стратегийн төлөвлөлт, хяналт-шинжилгээ, үнэлгээний газрын strategy@mfat.gov.mn цахим хаягаар, эсвэл 262085 дугаарын утсаар асуудал хариуцсан ажилтантай холбогдож болох нь.
Одоо Ардчилсан Орнуудын Хамтын Нийгэмлэгийг тэргүүлэх хугацаанд Монгол Улсын үүрэх хариуцлага, хийх ажил их байна. Шинэ үүрэг хүлээн авахдаа ерөнхийлөгч Ц.Элбэгдоржийн дэвшүүлсэн зарчмуудыг хэрэгжүүлэхэд иргэний нийгмийн байгууллагууд, залуучууд, эмэгтэйчүүд, бизнес эрхлэгчдийн цоо шинэ хандлага, эрэлхийлэл, идэвхитэй оролцоо бүр ч чухал.
Дархан-Уул аймаг. 2011.07.04
