Монгол Улсын Ерөнхийлөгч Цахиагийн Элбэгдоржийн урилгаар Бүгд Найрамдах Энэтхэг Улсын Ерөнхийлөгч, эрхэмсэг хатагтай Пратиба Дэвинсингх Патил, түүний нөхөр Девисингх Рамсингх Шекхават нарын Монгол Улсад хийх Төрийн айлчлал өнөөдөр буюу 2011 оны 7 дугаар сарын 27-ноос 30 хооронд үргэлжлэх юм.
Монгол Улсын Ерөнхийлөгч Ц.Элбэгдорж анхны гадаад айлчлалаа 2009 оны 9 дүгээр сарын 13-16-ны хооронд БНЭУ-ын Ерөнхийлөгч, хатагтай П.Д.Патилын урилгаар Энэтхэг Улсад төрийн айлчлал хийж эхлүүлж байсан билээ.
Айлчлалын үеэр хоёр орны Ерөнхийлөгч нар албан ёсны хэлэлцээ хийх бөгөөд, Монгол Улсын Ерөнхий сайд, УИХ-ын дэд дарга, Монголын эмэгтэй улс төрчдийн төлөөлөл Энэтхэгийн Ерөнхийлөгчид тус тус бараалхана.
Ерөнхийлөгч Пратибха Девисингх Патил Монгол, Энэтхэгийн бизнес уулзалтын нээлтэд оролцож үг хэлэх бөгөөд Энэтхэгийн эрх чөлөөний хөдөлгөөний нэрт зүтгэлтэн, хүчирхийллийн эсрэг үзэл санааг дэлгэрүүлэгч Махатма Гандийн хөшөөнд цэцэг өргөнө.
БНЭУ-ЫН ЕРӨНХИЙЛӨГЧ ПРАТИБА ДЭВИСИНГХ ПАТИЛ
1934 оны 12 дугаар сарын 19-нд БНЭУ-ын Махараштра мужийн Надгоан тосгоны Жалгоан дүүрэгт төрсөн.
Мумбай хотын Хуулийн Коллежийг эрх зүйч мэргэжлээр бакалаврын зэрэгтэй төгсөж Моолжи Жетха Коллежид эдийн засаг болон улс төр судлалын магистрын зэрэг хамгаалсан.
Хатагтай Пратиба Дэвисингх Патил Жалгаон дүүргийн шүүхэд хуульчаар ажилласнаар ажил амьдралын гараа нь эхэлсэн.
Түүний улс төрийн карьер 27 настайдаа Махараштра мужийн сонгуульд оролцсоноор эхэлсэн бөгөөд 4 удаа мужийн ассемблейд сонгогдож улс төр, соёл, нийгмийн хүрээний олон ажлыг удирдан зохион байгуулж ирсэн.
Тэрээр 1967-1972 онд Эрүүл мэндийн дэд сайд, 1972-1974 онд Махараштра мужийн сайд нарын танхимын гишүүн, Нийгмийн аюулгүй байдлын сайд, 1975-1976 онд Мужийн сайд нарын танхимын гишүүн, Соёлын сайд, 1977-1978 онд Мужийн сайд нарын танхимын гишүүн, Боловсролын сайд, 1982-1985 онд Мужийн сайд нарын танхимын гишүүн, Хот байгуулалтын сайд, 1985-1990 онд парламентын дээд танхимын гишүүн, орлогч дарга, 1991 онд Сансадын доод танхим Лок Сабхад гишүүн зэрэг төрийн өндөр албан тушаалд ажиллаж байсан.
Нөхөр доктор Дэвисингх Рамсингх Шекхават, охин Жёоти Ратхоре, хүү Ражендра Сингх.
2007 оны 7 дугаар сарын 25-ны өдөр БНЭУ-ын анхны эмэгтэй Ерөнхийлөгчөөр сонгогдсон.
