Өвөрхангай аймгийн 80 жилийн ойд
Монголын Тулгар төрийн 2220 жил, Их Монгол Улс байгуулагдсаны 805 жил, тусгаар тогтнолоо сэргээн тогтоосон Үндэсний эрх чөлөөний хувьсгалын 100 жил, Ардын хувьсгалын 90 жилийн ой тус тус нийцэн тохиосон билэгдэл төгс энэ түүхэн онд аймаг байгуулагдсаны 80 жилийн ойгоо тэмдэглэж буй Өвөрхангай нутгийн нийт иргэддээ чин сэтгэлийн мэндчилгээ дэвшүүлж байна.
Өврийн сайхан хангай нутаг байгалийн үзэсгэлэн, түүхэн их замнал хийгээд суу алдарт хүмүүсээрээ үеийн үед Монгол түмний бахархал болсоор ирсэн билээ.
Алтай, Хангайн уулсын зүүн үзүүр, Орхон, Онгийн сав газар, хангай, хээр, говь хосолсон энэ өргөн цэлгэр нутаг эрт үеэс эсгий туургат Монголчуудын гал голомт, түүх соёлын давтагдашгүй баялаг өлгий болсоор ирсэн түүхтэй.
Өвөрхангайчуудын дундаас шинэ цагийн Монгол Улсын анхны Ерөнхий сайд Т.Намнансүрэн, Ерөнхий сайд П.Гэндэн, Улсын баатар Л.Аюуш, Хөдөлмөрийн баатар, төрийн шагналт ардын уран зохиолч Д.Пүрэвдорж, ардын жүжигчин, төрийн хошой шагналт Н.Жанцанноров гээд эх орныхоо төлөө эрэмгий чадлаа, бүтээл туурвил, ухамсарт амьдралаа зориулж, үе үеийн Монголчуудын бахархал, дуурайл болсон олон суут хүмүүс төрөн гарчээ.
Найман арванаар өртөөлсөн нэгэн аймгийн түүх бол улс орны хөгжлийн салшгүй нэгэн хэсэг билээ. Өвөрхангайчууд Та бүхэн угтан ирэх он жилүүдэд нутаг орноо улам эрчимтэй хөгжүүлж, түмэн олноороо тэгш сайхан амьдрахын төлөө хичээн хөдөлмөрлөхийн сацуу түүхэн уламжлалаа баяжуулж улс үндэснийхээ хөгжил дэвшилд ч өөрсдийн үнэтэй хувь нэмрээ оруулсаар байх болно гэдэгт эргэлзэхгүй байна.
Хүн төвтэй нийгэм, байгальд ээлтэй хөгжлийг цогцлоон бүтээхийн төлөө хичээн хөдөлмөрлөх нь өнөөгийн Монголчууд Та бидний өмнө тавигдаж байгаа нэн чухал зорилт, хойч үеийнхнийхээ өмнө хүлээж байгаа туйлын хариуцлагатай бөгөөд хүндтэй үүрэг мөн.
Шударга ёсыг бэхжүүлж, хүн ардын сайн сайхан амьдралын баталгааг хангахад нутгийн удирдлага ч, иргэд олон нийт ч адилхан анхаарал тавьж хариуцлага хүлээдэг учиртай. Иргэдийнхээ нийтлэг эрх ашгийг дээдэлж, нутаг орныхоо амин чухал асуудлуудыг иргэдийнхээ идэвхтэй оролцоотойгоор шийдвэрлэдэг ил тод, хариуцлагатай сайн засаглалыг хөгжүүлэхийн төлөө харилцан хүчин чармайлт тавьж, улам хичээн ажиллахыг Өвөрхангай нутгийн удирдлага, нийт иргэддээ хичээн захья.
Та бүхний хичээнгүй хөдөлмөр, чин сэтгэлийн хүчин чармайлтын үрээр Монголын түүхийн домогт өлгий нутаг Өвөрхангай аймаг цаашид улам цэцэглэн хөгжих болтугай. Нутаг усны буян арвижиж, Түмэн олны сэтгэл амирлах болтугай.
Өвөрхангай аймаг байгуулагдсаны 80 жилийн түүхэн баярт тань хүндэтгэл илэрхийлж, дэлгэр сайхан наадахын ерөөл тавъя.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011оны 7 дугаар сарын 27-ны өдөр
Төрийн ордон Улаанбаатар хот
