Эрхэмсэг хатагтай Ерөнхийлөгч өө,
Хатагтай, ноёд оо,
Юуны өмнө миний урилгыг хүлээн авч Монгол Улсад төрийн айлчлал хийж байгаа Эрхэмсэг хатагтай Пратибха Девисингх Патил, эрхэмсэг ноён Девисингх Рамсингх Шекхват болон Энэтхэг Улсын төр, засгийн төлөөлөгчдийг Монгол Улсад тавтай морилж, тухлан саатахыг хүсэн ерөөе.
Энэ жил Монголын газар нутагт анхны төрт улс байгуулагдсаны 2220 жил, Их Монгол Улсын 805 жил, Үндэсний эрх чөлөөний хөдөлгөөний 100 жил мөн Ардын хувьсгалын 90 жил гээд манай улс, ард түмний түүхэнд болсон чухал үйл явдлуудын ой нэгэн зэрэг тохиож байна. Энэ билэг дэмбэрэлтэй цаг үед эртний уламжлалт харилцаатай Энэтхэг орны төрийн тэргүүн ийнхүү зочлон ирж байгаад билэгшээж байна.
2009 онд Эрхэмсэг хатагтай Ерөнхийлөгчийн урилгаар БНЭУ-д айлчилснаа миний бие болон миний гэргий найрсгаар санан дурсдаг бөгөөд Энэтхэгийн Ерөнхийлөгчийн хариу энэ айлчлал хоёр ард түмний нөхөрлөл, итгэлцэл гүнзгийрч буйн илэрхийлэл төдийгүй Монгол, Энэтхэгийн уламжлалт харилцаа, хамтын ажиллагааг гүнзгийрүүлж “Иж бүрэн түншлэл”-ийн шатанд гаргахад чухал алхам болж байна.
Бидний яриа хэлэлцээ чин сэтгэлийн найрсаг, харилцан ойлголцсон уур амьсгалд боллоо. Ерөнхийлөгч Пратибха Девисингх Патил-тай 2009 онд хэрэгжсэн дээрх айлчлалаас хойш харилцаанд гарсан ахиц дэвшлийг дүгнэж, цаашид хамтын ажиллагааг өргөжүүлэх, бүс нутаг, олон улсын тавцанд хамтран ажиллах асуудлаар санал солилцсондоо сэтгэл хангалуун байна.
Монгол Улс БНЭУ-тай улс төрийн итгэлцлийг гүнзгийрүүлэхийн сацуу худалдаа, эдийн засаг, хөрөнгө оруулалтын салбарт харилцан ашигтай хамтын ажиллагаа хөгжүүлэх боломжийг идэвхтэй эрэлхийлж ажил хэрэг болгох, улмаар соёл, боловсрол, хүмүүнлэгийн уламжлалт харилцаагаа өргөжүүлэхийн төлөө байна.
Монгол, Энэтхэгийн хооронд шинэ цагийн харилцаа холбоог эхлүүлэх мөн 1961 онд Монгол Улс НҮБ-ын бүрэн эрхт гишүүнээр элсэхэд Энэтхэгийн гарамгай удирдагч, Ерөнхий сайд Жавахарлал Неругийн оруулсан хувь нэмрийг Монголын ард түмэн өндрөөр үнэлж, талархан дурсаж байдгийг энд онцолмоор байна. Тэрээр Монголын түүх, монголчуудын талаар гүн мэдлэгтэй хүн байсан бөгөөд Монголын талаарх Ж.Неругийн эерэг ойлголт, зөв санаа нь Энэтхэгийн үе үеийн удирдагчид, улс төрчид Монгол, Энэтхэгийн харилцааг хөгжүүлэхэд хүч чармайлт тавьж өнөөгийн түвшинд гаргахад нөлөөлсөн гэж бид үздэг.
Оюун санаа, түүх уламжлалын бат бэх холбоонд суурилсан Монгол, Энэтхэгийн ард түмний харилцаа өнөө цагт хүнлэг энэрэнгүй, ардчилсан нийгмийн үнэт зүйлс, итгэл үнэмшлээр бэхжиж, улмаар хоёр орны болон бүс нутгийн энх тайван, хөгжил цэцэглэлийн тусын тулд улам өргөжин тэлж байгааг харахад нэн таатай байдаг. Цаашид ч бүс нутагт ардчиллыг бэхжүүлэх үйл хэргийн төлөө Эрхэмсэг хатагтай Ерөнхийлөгч Таньтай санаачилга, үр бүтээлтэй хамтран ажиллахдаа баяртай байх болно.
Энэ хундагыг,
- Эрхэмсэг хатагтай Ерөнхийлөгч Таны, Эрхэмсэг ноён Девисингх Рамсингх Шекхват Таны эрүүл мэндийн төлөө,
- Энд хүрэлцэн ирсэн монгол, энэтхэг анд нөхдийн эрүүл мэндийн төлөө,
- Монгол, Энэтхэгийн ард түмний найрамдалт харилцаа, хамтын ажиллагаа улам бэхжин хөгжихийн төлөө,
- Энэтхэгийн ард түмний сайн сайхны төлөө өргөе.
2011 оны 7 дугаар сарын 28-ны өдөр
