Монгол Улсад Төрийн айлчлал хийж буй Бүгд Найрамдах Энэтхэг Улсын Ерөнхийлөгч Эрхэмсэг хатагтай Пратибха Девисингх Патил, ноён Девинсингх Рамсингх Шекхават нар өнөөдөр айлчлалынхаа гурав дахь өдөр “Монгол Шилтгээн” цогцолборт Ерөнхийлөгч Цахиагийн Элбэгдорж, Тэргүүн хатагтай Хажидсүрэнгийн Болормаа нарын хамтаар Монгол түмний уламжлалт Эрийн гурван наадмыг илтгэсэн бэсрэг наадам үзэж сонирхлоо.
Наадмын үеэр хүчит бөхийн барилдаан, хурдан морины уралдаан, сурын харваа зохиогдож ардын урлагийн дээж болсон хөөмий, морин хуур, уран нугаралт, олон ястны бүжиг зэрэг язгуур урлагийн үзүүлбэрүүдийг үзэв.
Бэсрэг наадам үзсэнийхээ дараа БНЭУ-ын Ерөнхийлөгч, Эрхэмсэг хатагтай Пратибха Девисингх Патил өөрийн сэтгэгдлээ илэрхийлэхдээ, “Өнөөдөр Монгол түмний өв соёлын илэрхийлэл болсон бэсрэг наадмыг үзсэндээ баяртай байна. Монголчууд бол ёс заншлаа гайхамшигтай хадгалж үлдсэн аугаа үндэстэн юм. Хурдан морь, хүчит бөх, сурын харваа, монгол бүжиг, дуу хөгжим, уртын дуу гээд энэ бүхэн үнэхээр сайхан сэтгэгдэл үлдээлээ. Мөн энэ бүхнийг Эрхэм Ерөнхийлөгч Ц.Элбэгдорж сэтгэл бахдам үзэж буйд баяртай байна. Айлчлалыг сайн зохион байгуулж буй хүмүүст талархал илэрхийлж Монголын ард түмэнд сайн сайхан бүхнийг хүсэн ерөөж байна” хэмээв.
Дараа нь Монгол Улсын Ерөнхийлөгч Ц.Элбэгдорж үг хэлэхдээ, “БНЭУ-ын Эрхэмсэг Ерөнхийлөгчийн манай улсад хийж буй Төрийн айлчлал амжилттай үргэлжилж байна. Түүний гэр бүл, дагалдан яваа хүмүүс айлчлалд сэтгэл хангалуун байгаад бид баяртай байна. Эртний уламжлалт харицлаатай хоёр орны харилцаа агуулгын хувьд улам бүр өргөжиж түвшин өндөрслөө” хэмээн онцлон хэлэв.
