Дундговь аймаг үүсгэн байгуулагдсаны 70 жилийн ойд
Эрхэм хүндэт Дундговьчууд аа,
Эрхэм хүндэт зочид, хатагтай, ноёд оо,
Монголын Тулгар төрийн 2220 жил, Их Монгол Улс байгуулагдсаны 805 жил, тусгаар тогтнолоо сэргээн тогтоосон Үндэсний эрх чөлөөний хувьсгалын 100 жил, Ардын хувьсгалын 90 жилийн түүхэн ойнууд тохиосон жил миний бие Монгол Улсын Ерөнхийлөгчийн хувьд эдүгээ 70 жилийн түүхт ойгоо тэмдэглэж буй говийн хөдөлмөрч ард түмэндээ чин сэтгэлийн халуун мэнд хүргэе.
“Их газрын чулуу”, “Бага газрын чулуу” гээд элсэнд сүндэрлэсэн гандирс мэт эртний домогт байгалийн үзэсгэлэнгээрээ гоёж, ээрэм талд шаргалтан зэрэглээтэх говь нутагт дэлгэр зун ирж, ард хотлоороо бүтээн цогцлоосон арвин их амжилттай түүхт их ойгоо угтан золгож байгаад Төрийн тэргүүн миний бие сэтгэл дүүрэн байна.
Өнгөрсөн он жилүүдийн ололт амжилт бол үе үеийн Дундговийн ард түмний хөдөлмөрлөж, тэмцэж, бүтээж буй болгосон нийтлэг үнэт зүйл юм.
Та бүхэн намтар түүхийнхээ 70 жилийн он цагийн хугацаанд хөдөлмөрлөж, бүтээн байгуулж, аливаа хүнд сорилтыг даван туулж олсон ололт амжилтын үр дүнд Дундговь аймаг өдгөө Монгол Улсын хөгжил дэвшлийн нэгэн том орон зай болон хөгжин дэвжиж, “Дуу хуурын өлгий” нутаг хэмээх эрхэм хүндтэй нэр алдраа өндөрт өргөж яваа нь бидний бахархал билээ.
Хэдийгээр уур амьсгалын өөрчлөлт, дэлхийн дулаарлын нөлөөгөөр тал хээр, говь, нутагт цөлжилт эрчимтэй явагдаж уламжлалт бэлчээрийн мал аж ахуй, малчдын амьжиргаанд ихээхэн хүндрэл учруулж буй боловч энэ жил өвс ногоо дэлгэрч малчин түмэн маань 450 мянган төл бойжуулж, мал сүргээ өсгөж, автозам, өндөр хүчдлийн шугам барих ажлыг Та бүхэн эхлүүлсэн нь сайшаалтай байна.
Цөлжилт, элсний нүүдлийг сааруулах, бэлчээрийн талхлалтыг багасгах ажлыг санаачлан зохион байгуулж, аймгийнхаа хэмжээнд 2000 гаруй га бэлчээрийг хашиж, бэлчээрийн ургамлын олон төрлийн сортыг туршин ургуулж, мөн сүүлийн 2 жил мод тарих, арчлах, ургуулах, цэцэрлэгжүүлэх ажлыг аймагтаа амжилттай хэрэгжүүлж, нийт 138288 мод, 9000 ширхэг чацаргана тарьсан зэрэг олон бүтээлч ажлуудыг хийж гүйцэтгэжээ.
Дундговьчууд Та бүхэн цаашид таван хошуу малаа, түүний дотор дэлхийд ховорхон тэмээн сүргийнхээ тоо толгойг өсгөж, эрчимжсэн мал аж ахуй, аялал жуулчлалыг хөгжүүлж, ялангуяа жижиг аж ахуйнуудыг байгуулж говийнхоо хөрсөнд амт чанар сайтай хүнсний ногоо тарьж ургуулан, уламжлалт цагаан идээ, ноос ноолуураа хоршин боловсруулж, газар бүр шинэ бүтээн байгуулалт, шинэ санаачилга өрнүүлж ажиллаваас хүн бүрийн амьдрал өөдлөн дэвжиж, төрөлх нутагтаа элбэг хангалуун, энх тунх, эвтэй найртай аж төрөх нөхцөл бүрдэнэ.
Монгол үндэсний хэл соёл, ёс заншил, ардын уртын дуу, морин хуураа залуу хойч үедээ өвлүүлэн үлдээх нь Та бүхний ариун үүрэг юм шүү.
Говь шигээ уужуу сэтгэлтэй их говийн ард олон Та бүхэндээ болон Дундговь аймаг үүсгэн байгуулагдсаны 70 жилийн түүхэн баярт тань гүн хүндэтгэл илэрхийлж, дэлгэр сайхан наадахын ерөөл дэвшүүлье.
Монгол орны бахархал болсон говь нутаг маань
мөнхөд цэцэглэн хөгжих болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 07 дугаар сарын 29
