Эрхэм хүндэт ноёд оо!
Эрхэм генерал, офицер ахлагч нар аа!
"КНААN QUEST-2011” олон улсын энхийг дэмжих ажиллагааны хамтарсан сургалт, дадлагад оролцож байгаа хүндэт зочид оо!
Та бүхний энэ өдрийн түмэн амгаланг айлтгая!
Монгол Улсад зургаа дахь жилдээ явагдаж байгаа "КНААN QUEST-2011" олон үндэстний энхийг дэмжих ажиллагааны сургалт, дадлагад оролцохоор жигдрэн жагссан цэрэг дайчид Та бүхэнд Монгол Улсын Төрийн тэргүүний хувьд чин сэтгэлийн мэндчилгээ дэвшүүлж, даян дэлхийд энхийг сахиулах нэр хүндтэй үйлсэд Тань өндөр амжилтыг хүсэн ерөөе!
Монгол Улс энхийг эрхэмлэсэн гадаад бодлогынхоо хүрээнд Монгол Улсын Зэвсэгт хүчин, АНУ-ын Зэвсэгт хүчний Номхон далай дахь цэргийн командлал, "Дэлхийн энхийн төлөө санаачилга" хөтөлбөртэй хамтран зохион байгуулдаг "КНААN QUEST-2011" олон үндэстний энхийг дэмжих ажиллагааны сургалт, дадлага нь НҮБ-ын цэнхэр дуулгатны эгнээг өргөтгөх, оролцогч улс орнуудын энхийг дэмжих чадамжийг нэмэгдүүлэх, Ази, Номхон далайн бүс нутагт цэргийн итгэлцлэл, аюулгүй байдлыг бэхжүүлэхэд бодитой хувь нэмэр оруулж байгаа томоохон арга хэмжээ гэж Монгол Улсын төр засаг, ард түмэн үздэг бөгөөд манай Зэвсэгт хүчин энэхүү сургалт, дадлагыг өөрийн оронд зохион байгуулах тодорхой хэмжээний туршлага хуримтлуулсныг сайшаан тэмдэглэхийг хүсч байна.
Монголын Зэвсэгт хүчний цэргийн албан хаагчдын НҮБ-ын энхийг дэмжих ажиллагаанд үзүүлж буй амжилт, мэргэжлийн ур чадвар, сахилга зохион байгуулалтыг олон улсын хэмжээнд өндрөөр үнэлж байгаа нь Монголын энхийг сахиулагчдын Дэлхийн энх тайвны төлөө оруулж буй хувь нэмэр, оролцоо, гүйцэтгэсэн үүрэг, туршлага, хичээл зүтгэлийн үр дүн юм.
“КНААN QUEST-2011" сургалт дадлагад оролцож байгаа улс орнуудын Зэвсэгт хүчний дайчдын сургалтын чанар, агуулга, ач холбогдол жилээс жилд өсч, бүс нутгийн хэмжээний нэр хүндтэй сургалт, дадлага болж байгаад Монгол Улсын Ерөнхийлөгчийн хувьд гүнээ талархаж байгаагаа илэрхийлье.
Цаашид НҮБ-ын энхийг дэмжих ажиллагаанд үүрэг гүйцэтгэхэд шаардлагатай цэргийн хэргийн мэдлэг, ур чадварт суралцах, бие бялдар, ёс суртахуун, сэтгэл зүйн өндөр бэлтгэлжилттэй байх, дэлхийн өнцөг булан бүрт, янз
бүрийн нөхцөл байдалд үүрэг гүйцэтгэсэн туршлага, сургамжаа харилцан хуваалцах, болзошгүй аюул заналын үед бэлэн байх явдал нь энхийг дэмжигч, цэнхэр дуулгатан бүрийн эрхэм зорилт байгаасай гэж хүсч байна.
"КНААN QUEST-2011" сургалт дадлага нь Монгол Улсын хувьд олон түүхэн тэгш ой тохиож, Зэвсэгт хүчний цэргийн багууд НҮБ-ын мандаттай энхийг дэмжих үйлсэд үүрэг гүйцэтгэх оролцоо улам бүр нэмэгдэж байгаа цаг үед зохион байгуулагдаж байгаагаараа онцлогтой юм.
Төрт ёс, ардын арвин зан үйл, нүүдэлчин соёл иргэншлийн өвөрмөц өнгө төрхөө өнөө хүртэл хадгалж ирсэн Монгол түмний өлгий нутагт тавтай морилон, ихийг сурч, улс үндэстнүүдийн найрамдал нөхөрлөлийг бэхжүүлэх үйлсэд өөрсдийн хувь нэмрээ оруулна гэдэгт Монголчууд бид итгэлтэй байна.
“КНААN QUEST-2011" олон үндэстний энхийг дэмжих ажиллагааны сургалт дадлагад оролцогсод Та бүхэнд дахин талархал илэрхийлж, аз жаргал, эрүүл энх, сайн сайхан бүхнийг хүсэн ерөөе!
