Монголын тулгар төр байгуулагдсаны 2220 жил, Их Монгол Улс байгуулагдсаны 805 жил, Үндэсний эрх чөлөөний хувьсгалын 100 жил, Ардын хувьсгалын 90 жил хийгээд Монгол Улс НҮБ-д нэгдэн орсны 50 жилийн түүхэн их ойг тус тус тохиолдуулан Монгол Улсын Ерөнхийлөгч Цахиагийн Элбэгдоржийн ивээлд зохион байгуулагдаж буй “Олон Улсын Монголч эрдэмтний Х хурал” өнөөдөр Төрийн ордонд нээлтээ хийв.
Арав дахь удаагаа зохион байгуулагдаж буй 50 гаруй жилийн түүхтэй энэ удаагийн монголч эрдэмтэн мэргэдийн чуулган 8 сарын 9-нөөс 13-ны өдрийг дуустал Улаанбаатар хотноо үргэлжлэх бөгөөд Австри, Англи, АНУ, Герман, Голланд, Дани, Испани, Итали, Казахстан, Канад, Норвеги, ОХУ, Польш, Солонгос, Тайван, Турк, Унгар, Финланд, Франц, Хятад, Чех, Швед, Швейцар, Энэтхэг, Японы 200 гаруй Монголч эрдэмтэн хүрэлцэн ирээд байгаа юм.
Монгол Улсаас энэ хуралд 100 гаруй эрдэмтэн судлаач илтгэл тавьж оролцох бөгөөд нийт 800 гаруй эрдэмтэн судлаач энэ удаагийн хуралд оролцож байна.
Олон Улсын Монголч Эрдэмтний Анхдугаар хурал 1959 онд зохион байгуулагдаж байсан түүхтэй бөгөөд таван жил тутамд ийнхүү чуулан зохиогддог уламжлалтай юм.
Энэ удаагийн 10 дугаар хурлын Ерөнхий хамрах сэдэв нь “Монголын гадаад харилцаа ба түүхэн туршлага” өгөөд хурал дараах таван салбараар хуралдана.
Үүнд: “Түүхийн өмнөх үе болон түүхэн үеийн Монгол ба гадаад ертөнц” сэдвээр Нэгдүгээр салбар хуралдаан, “Монгол хэл, соёлын тулгамдсан асуудлууд” сэдвээр Хоёрдугаар салбар хуралдаан, “Монголын эдийн засаг, улс төр” сэдвээр Гуравдугаар салбар хуралдаан, “Монголын гадаад харилцаа, дипломат ёс” сэдвээр Дөрөвдүгээр салбар хуралдаан, “Монголын тусгаар тогтнол, хувьсгал” сэдвээр Тавдугаар салбар хуралдаан тус тус зохион байгуулагдах юм.
Энэ удаагийн хурлаар Монголын гадаад харилцааны түүхэн уламжлал, үндэсний эрх чөлөөний хувьсгал, үндэсний тусгаар тогтнол, төрийн бодлого, эрт эдүгээгийн Монголын эх түүх, нийгэм, эдийн засаг, хэл бичиг, утга зохиол, иргэншил, соёлын судалгаа зэргийг онцлон анхаарах зорилготой юм.
Хурлын нээлтэд Монгол Улсын Ерөнхийлөгч Цахиагийн Элбэгдорж оролцон үг хэлж Монгол судлаач эрдэмтний 10 дугаар хуралд оролцож буй нийт эрдэмтэн судлаачдад мэндчилгээ дэвшүүлэв.
Мөн тэрээр Монгол судлалыг хөгжүүлэх, цаашид эрдэмтдийн залуу халааг бэлтгэх, Монгол судлалын сан байгуулах болон Монгол Судлалын Их Сургууль, Эрдэм судлалын төв байгуулах талаар тодорхой саналууд дэвшүүлэн хурлын үйл ажиллагаанд амжилт хүсэв.
