Энэ оны 1 дүгээр сарын 25-ны өдөр Монгол Улсын Ерөнхийлөгч Цахиагийн Элбэгдорж Швейцарь Улсад айлчлал хийх үеэрээ Лозанн хотноо байрлах Олон Улсын Олимпийн Хорооны Төв байранд зочилж, Ерөнхийлөгч Жак Роггетой уулзсан юм.
Тухайд үед, Ерөнхийлөгч Цахиагийн Элбэгдорж Монгол Улс 2017 оны Зүүн Азийн, 2023 оны Азийн, 2040 оны Олимпийн наадмын төлөө өрсөлдөх зорилготой байгаагаа илэрхийлж, ОУОХ-ны Ерөнхийлөгч Жак Роггетой хамт “Хамтарсан бичиг”-т гарын үсэг зурсан юм.
Монгол Улсын Ерөнхийлөгч Цахиагийн Элбэгдорж энэхүү “Хамтарсан бичиг”-ийг Монголын Олимпийн музейд хадгалуулах шийдвэр гаргаж өнөөдөр Монгол Улсын Ерөнхийлөгчийн Ахлах зөвлөх П.Цагаан МҮОХ-ны Ерөнхийлөгч Д.Загдсүрэнд гардуулав өгөв.
Энэ үеэр Ахлах зөвлөх П.Цагаан хэлсэн үгэндээ, “Дэлхийн хүн төрөлхтөний энх тайван, эв нэгдэл, нөхөрлөлийн билэг тэмдэг болсон Зуны Олимпийн XXX дугаар наадам Лондон хотноо эхлэхэд нэг жилийн хугацаа үлдлээ. Өнгөрөгч XXIX дүгээр Олимпоос Монголын ард түмэн од шүүрч дэлхийн дэвжээнд өрсөлдөх чадвартайгаа харуулсан билээ.
2011 оны 1 дүгээр сарын 25-нд Лозанна хотноо Монгол Улсын Ерөнхийлөгч Цахиагийн Элбэгдорж, Олон Улсын Олимпийн хорооны Ерөнхийлөгч Жакюс Рожже нар нэгэн чухал “Түүхэн тэмдэглэл”-д гарын үсэг зурцгаасан юм. Энэ бол гэрээ хэлцэл биш, баримт бичиг ч биш харин Монголын ард түмний хүсэл тэмүүлэл, мөрөөдлийг илтгэсэн бас хэрэгжих боломжтой бодит зорилгыг агуулсан тийм үнэ цэнэтэй дурсгалын самбар юм.
Тун удахгүй энэ наймдугаар сарын сүүлээр Олон Улсын Олимпийн Хорооны Ерөнхийлөгч Монгол Улсад айлчилахаар яригдаж байгаа. Монгол Улсын Ерөнхийлөгч ойртож буй Олимпийн наадамд өндөр ач холбогдол өгч байгаа. 2010 оны 3 сарын 23-нд Нийтийн биеийн тамир, спортыг хөгжүүлэх тухай 53 тоот зарлиг гаргасан. Энэ бол Монголд спортыг улам бүр хөгжүүлэх, эрүүл биед саруул ухаан оршоож улмаар саруул ухаанаар эх орноо хөгжүүлэн авч явах эрүүл чийрэг ирэгддтэй байх бодлого юм.
Ингээд энэ “Дурсгалын самбар”-ыг Монголын Олимпийн хорооны Ерөнхийлөгч таньд өргөн барьж танай музейд дурсгаж байна. Монголоос Олимпийн олон төрөлд аваргууд төрж, бас Монгол Улсад Олимпийн наадам зохиогдох болтугай” хэмээв.
Дараа нь МҮОХ-ны Ерөнхийлөгч Д.Загдсүрэн хэлсэн үгэндээ, “Аливаа улсын хувьд олимпийн амжилт үзүүлэх нь ард түмний болон тамирчдын чин сэтгэлийн тэмүүлэл, эрмэлзлэл хамгийн том хөдөлгөгч хүч болдог. Монгол Улсын Ерөнхийлөгч болон Олон Улсын Олимпийн Хорооны Ерөнхийлөгч нарын хамтран гарын үсэг зурсан энэ бичиг манай тамирчдад ихээхэн эрч хүч, эрмэлзлэл өгнө гэдэгт итгэлтэй байна” гэж онцлон тэмдэглэв.
