Монгол Улсын Ерөнхийлөгч Ц.ЭЛБЭГДОРЖ, Бүгд Найрамдах Солонгос Улсын Ерөнхийлөгч ЛИ МЕН БАГ нар албан ёсны хэлэлцээ хийлээ. Хэлэлцээний эхэнд, БНСУ-ын Ерөнхийлөгчийн энэ удаагийн айлчлал нь хоёр орны харилцааг шинэ шатанд гаргах түүхэн айлчлал болно гэдэгт итгэж байгаагаа хоёр Ерөнхийлөгч нотоллоо.
Монгол Солонгос улсуудын харилцаа хэдийгээр 20 гаруйхан жилийн түүхтэй боловч энэ хугацаанд хоёр талаас гаргасан хүчин чармайлтын үр дүнд ард түмний хооронд найрсаг харилцаа тогтож, “Сайн хөршийн найрамдал, хамтын ажиллагааны түншлэл”-ийн зарчимд тулгуурласан эдийн засаг худалдаа, соёл боловсрол, хүмүүнлэг, эрүүл мэндийн салбарт харилцаа хамтын ажиллагаа тууштай хөгжиж байгааг дурдаад дэд бүтэц, эрчим хүч, хөдөө аж ахуй зэрэг салбаруудад харилцаа, хамтын ажиллагааг улам бүр гүнзгийрэн хөгжүүлэхийн чухлыг санал нэгтэй тэмдэглэлээ.
Сүүлийн жилүүдэд манай хоёр орны ард түмний итгэлцэл, ойр дотно байдал улам бүр нэмэгдэж байна. Хоёр улсад харилцан зорчих, сурч ажиллах байдал нэмэгдэж байгааг харгалзан зорчих нөхцлийг хөнгөвчлөх, агаарын урсгалыг нэмэгдүүлэх, виз олгох журмыг хялбаршуулах зэрэг шаардлага тавигдаж байгааг хүлээн зөвшөөрч, энэ чиглэлээр хамтарсан хөтөлбөр байгуулж ажиллах талаар харилцан ярилцлаа. Цаашдаа Солонгос Улсад ажиллаж амьдарч байгаа монголчуудыг мэргэшүүлэх, эзэмшсэн мэргэжлийнх нь хүрээнд ажиллуулах боломж байгаа талаар санал солилцов.
БНСУ-ын зүгээс манай улсад эдийн засгийн хөгжлийг тогтворжуулахад хөнгөлөлттэй зээл тусламж үзүүлсээр ирсэнд монголын ард түмэн талархаж байдаг. Энэ удаад ч мөн БНСУ-ын Засгийн газраас 300 сая америк долларын хөнгөлөлттэй зээл олгохоор болсон. Энэхүү хөнгөлөлттэй зээлээр “Үндэсний оношлогоо эмчилгээний төв” байгуулж, бүс нутгийн хүрээнд хамтын ажиллагааны үлгэр жишээ болгох нь зүйтэй гэж хэлэлцээний үеэр санал нэгтэй ярилцав.
Монгол Улсын Эрдэс баялаг, эрчим хүчний яам болон БНСУ-ын Мэдлэгийн эдийн засгийн яам хооронд санамж бичиг байгуулж, Улаанбаатар хотын агаарын бохирдлыг бууруулах зорилгоор Багануурын уурхайг түшиглэн нүүрс гүн боловсруулах үйлдвэр байгуулах талаар хоёр тал хамтран ажиллахаар тохирсон бөгөөд энэ төслийг шуурхай хэрэгжүүлэх талаар дэмжлэг үзүүлэхийг монголын тал хүслээ.
“Монгол Улс түүхий эд экспортлохоос илүү эцсийн бүтээгдэхүүн үйлдвэрлэж, нэмүү өртөг бий болгох сонирхолтой. Үүний тулд бидэнд сайн технологи хэрэгтэй бөгөөд та бүхэнтэй энэ чиглэлээр хамтран ажиллах сонирхол байна. Бидэнд хот байгуулалт, эрүүл мэнд, хөдөө аж ахуй, байгал орчин, хөрөнгө оруулалтын чиглэлээр хамтран ажиллах боломж бий. Эдгээр чиглэлд солонгосын хөрөнгө оруулагчид анхаарлаа хандуулаасай гэж хүсч байна” хэмээн Ерөнхийлөгч Ц.Элбэгдорж хэллээ.
Ерөнхийлөгч Ли Мен Баг, нэн яаралтай болон ирээдүйтэй салбаруудад хөрөнгө оруулах мөн буцалтгүй болон хөнгөлөлттэй зээл олгох Засгийн газрын төсөл хөтөлбөрүүд үргэлжилсээр байх болно гээд байгал орчныг хамгаалах, агаарын бохирдыг бууруулах чиглэлээр ажиллах талаар санал солилцов.
Мөн бүс нутаг, олон улсын тавцан дахь хамтын ажиллагааны талаар харилцан санал солилцов.
Ерөнхийлөгч Ц.Элбэгдорж, Монгол Улс Ардчилсан орнуудын хамтын нийгэмлэгийг даргалж байгаа бөгөөд энэ чиглэлээр гаргаж байгаа санал санаачилгыг дэмжиж байгаад талархаж байгаагаа ноён Ли Мен Баг-т илэрхийллээ.
