НҮБ-ын дээд хэмжээний 64 дүгээр чуулганд оролцож байгаа Монгол Улсын Ерөнхийлөгч Ц.Элбэгдорж 2009 оны 9 дүгээр сарын 21-нд нэрт нийтлэлч, эдийн засагч Эрнандо де Сотог хүлээн авч уулзлаа.
Эрнандо де Сото Полар бол чөлөөт эдийн засаг, өмчийн эрхийн талаар алдартай бүтээлүүд туурвиснаараа дэлхий дахины танил болсон нэгэн юм. Түүнийг долоон настай байхад нь 1948 онд эх оронд нь цэргийн эргэлт гарч түүний эцгийг дипломатчийн ажлаас нь халж Европруу цөллөгт илгээсэн байна.
Ийнхүү эцгийнхээ хамт цөлөгдсөн ноён Сото Щвейцарьт боловсрол эзэмшиж хожмоо Щвейцарын Эрх чөлөөний шагнал, Английн Эрх чөлөөний шагнал, АНУ-ын Голдватерийн шагнал, АНУ-ын Темпельдоны эрх чөлөөний шагнал зэрэг нэр хүндтэй 20 гаруй шагналын эзнээр тодорсон орчин цагийн томоохон эдийн засагч болж чаджээ.
Түүний бүтээлүүдээс хамгийн алдартай нь дэлхийн 30 гаруй орны хэл дээр хэвлэгдсэн “Капиталын нууц” зохиол юм. Өдгөө тэрбээр Перу Улсын Ерөнхийлөгчийн “Чөлөөт нийгэм ба Ардчилал” хүрээлэнд харъяалагддаг байна.
Ерөнхийлөгч Ц.Элбэгдорж, ноён Э.Сотогийн чөлөөт эдийн засгийг хөгжүүлэх, ардчиллын үнэт зүйлсийг бэхжүүлэхэд оруулж байгаа хувь нэмрийг өндрөөр үнэлж явдагаа илэрхийлээд, удахгүй Монгол Улсад ирж, монгол орны эдийн засаг улстөрийн өнөөгийн байдалтай танилцан, үнэтэй зөвлөгөөгөө өгнө гэдэгт итгэж байгаагаа өгүүллээ.
Ноён Сото, Ерөнхийлөгчийн ардчиллыг бэхжүүлэх үйлсэд нь амжилт хүсээд, хэзээ нэгэн цагт Монгол Улсад очино гэдгээ ирэлхийлсэн байна.
Тэд ардчилал, хүний эрх, хямралын үеийн эдийн засаг, уур амьсгалын өөрчлөлтийн асуудлаар илэн далангүй ярилцлаа.
Дараа нь, Ноён Эрнандо де Сото МҮОНТВ-ийн “ММ” агентлагт ярилцлага өглөө.
