Эрхэмсэг ноён Ерөнхийлөгчөө,
Тэргүүн хатагтай,
Хатагтай, ноёд оо,
Миний урилгыг хүлээн авч Монгол улсад төрийн айлчлал хийж байгаад Эрхэмсэг ноён Ерөнхийлөгч, Тэргүүн хатагтай Та бүхэнд Монголын ард түмний өмнөөс, хувиасаа болон гэргийнхээ өмнөөс чин сэтгэлийн талархал илэрхийлье. Монголчуудын сайн танил Эрхэмсэг ноён Ерөнхийлөгч Таны энэ удаагийн Монгол Улсад хийж байгаа айлчлал, яриа хэлэлцээ хоёр орны харилцааны түүхэнд шинэ хуудас нээсэн, үр дүнтэй чухал айлчлал болж байна.
Манай хоёр орон, ард түмэн олон зуун жилийн тэртээгээс ураг төрлийн холбоотой явж ирсэн билээ. Монгол Улс, БНСУ-ын хооронд 1990 онд дипломат харилцаа тогтоосноос хойш хоёр орны хамтын ажиллагаа бүх л салбарт хэлбэрэлтгүй өргөжин хөгжиж байгааг тэмдэглэхэд таатай байна.
Өнөөдөр Та бид харилцан ойлголцож, бие биеэ хүндэтгэсэн чин сэтгэлийн найрсаг уур амьсгалд ихээхэн үр дүнтэй хэлэлцээ хийлээ. Айлчлалын дүнгийн талаар “Монгол Улс, БНСУ-ын хамтарсан мэдэгдэл” гаргаж, хоёр орны харилцаа, хамтын ажиллагааг цаашид “иж бүрэн түншлэл”–ийн зарчмын үндсэн дээр хөгжүүлэхээр тунхаглан хоёр орны хамтын ажиллагааны тэргүүлэх чиглэлийг тусгасан “Монгол улс, БНСУ-ын хамтын ажиллагааны дунд хугацааны хөтөлбөр”-ийг байгуулсан нь түүхэн чухал ач холбогдолтой үйл явдал болж байна.
Монгол орны байгалийн баялаг, түүхий эдийн нөөцийг БНСУ-ын хөрөнгө, тэргүүний техник, технологитой хослуулан харилцан ашигтай хамтын ажиллагааг хөгжүүлэх боломж, ирээдүй байгаа бөгөөд тийм шаардлага ч байна гэж үзнэ. Хоёр орон энэ чиглэлд амжилттай хамтран ажиллана гэдэгт эргэлзэхгүй байна.
Хүндэт зочид оо,
Монголчууд “айл хүний амь нэг, саахалт хүний санаа нэг” гэдэг бол солонгос хэлэнд “хөршүүд үеэлтэй адил“ гэсэн адил утгатай зүйр үг байдагчлан манай хоёр орон Зүүн Хойд Азид оршдог, түүхэн уламжлалт харилцаатай, ардчилал, зах зээлийн харилцааны үнэт зүйлсийг нэгэн адил эрхэмлэдэг, хүсэл эрмэлзэл нэгтэй түнш орнууд билээ.
Монгол Улс өнгөрсөн 7 дугаар сараас Ардчилсан орнуудын хамтын нийгэмлэгийг хоёр жилийн хугацаатайгаар даргалж байна. Арван жилийн дараа Азийн оронд дахин ногдож буй АОХН-ийг даргалах энэхүү хариуцлагатай, нэр төртэй үүргийг олон улсын хамтын нийгэмлэгийн дэмжлэг туслалцаатайгаар амжилттай гүйцэтгэхийн төлөө хүчин чармайлт гаргаж ажиллах болно. Миний дэвшүүлсэн “Ардчиллын төлөөх Азийн түншлэл” санаачилгыг Эрхэмсэг ноён Ерөнхийлөгч дэмжсэнд талархал илэрхийлье. Энэ санаачилгад Азийн бусад орнуудыг өргөнөөр хамруулах чиглэлээр Монгол, Солонгосын тал үр дүнтэй хамтран ажиллана гэдэгт итгэл төгс байна.
Монголчуудын хийсэн ардчилсан хувьсгал бол зөвхөн нэг орны төдийгүй нийтлэг шинж чанартай ололт юм. Монголчууд түүхэн сонголтоороо хүний эрх, эрх чөлөөт байдал, хүний нэр төр, ариун нандин чанар гэдэг бол зөвхөн хөгжилтэй баян улс орнуудын иргэдийн эдэлдэг тусгай эрх ямба биш харин аль ч оронд хүн бүрийн эдлэх боломжтой жам ёсны эрх гэдгийг нотолж чадсан. Мөн тайван замаар хувьсгалт шинжтэй өөрчлөлтийг нийгмийн бүх салбарт нэгэн зэрэг хийж болохыг монголчууд харууллаа. Улс төр, эдийн засгийн өөрчлөлтийг нэгэн зэрэг хийх нь “Азийн орны зам биш” гэсэн ойлголт байдаг. Иймэрхүү хуучин дүгнэлтийг бид шинэ сонголтоороо эвдсэн. Монгол Улсыг хүн амын тоо, хөгжлийн түвшингээр нь жижиг орон гэж үзэж болох ч сүүлийн 20 гаруй жилийн ардчилсан, нээлттэй бодлого нь манай орныг энэ салбарт том үлгэр жишээ болгож байна.
БНСУ ахар богино хугацаанд өндөр хурдацтай хөгжиж, “Хан мөрний гайхамшиг”-ийг буй болгож, эдүгээ дэлхийн хөгжингүй орнуудын эгнээнд хүрсэн амжилтаа улам бататгаж, урагшлан хөгжиж байгааг бид бахдан харж, баяр хүргэж байна. Энэ үйлсэд эрхэм хүндэт Ерөнхийлөгч Таны ардчиллыг тогтоон гүнзгийрүүлэх, эдийн засгаа хөгжүүлэх талаар явуулж ирсэн бодлого, үйл ажиллагаа ихээхэн хувь нэмэр оруулж, БНСУ-ын олон улсын нэр хүнд улам дээшилж байгаад баяр хүргэе.
БНСУ-ын тогтвортой хөгжил, Солонгосын хойгийн энх тайван байдал нь Зүүн х ойд Азийн энх тайван, аюулгүй байдлыг бэхжүүлэх нэг гол хүчин зүйл болж, тус бүс нутгийн орнуудын хамтын ажиллагааг улам өргөтгөн хөгжүүлэх чухал нөхцөл болно гэдгийг тэмдэглэж байна.
Эрхэмсэг ноён Ерөнхийлөгч, Тэргүүн хатагтай болон дагалдан яваа Солонгосын эрхэм зочид Монгол оронд тав тухтай морилон саатахыг чин сэтгэлээс хүсч байна.
