Монгол Улсын Ерөнхийлөгч Ц.Элбэгдоржид Хятадын коммунист намын Төв хорооны Улс төрийн товчооны байнгын хорооны гишүүн, Төв хорооны намын улс төр, хуулийн хорооны нарийн бичгийн дарга Жоу Юнкан өнөөдөр бараалхав.
Өнөө жил Монгол Улсын Ерөнхий сайдын БНХАУ-д хийсэн айлчлалын үеэр Монгол, Хятадын харилцааг стратегийн түншлэлийн харилцаанд хүргэхээ зарласан. Энэ бол Монгол, Хятадын харилцаа бүх салбарт өргөжин хөгжиж буйг нотолж байна. Хоёр улсын хооронд өндөр, дээд түвшний харилцан айлчлал тогтмол хийж байгаа нь хамтын ажиллагааг гүнзгийрүүлэх, улс төрийн харилцан ойлголцол, итгэлцлийг бэхжүүлэхэд чухал үүрэгтэй гэж үзэж байна.
Өнгөрсөн жил БНХАУ-д хийсэн айлчлалаараа Ху Жиньтао даргатай уулзаж, хоёр орны харилцааны асуудлаар халуун дотно ярилцсан. Таны энэ удаагийн айлчлал ч хоёр улсын хамтын ажиллагааны олон асуудлыг шийдсэн чухал айлчлал гэж бодож байна. Хоёр орны харилцааны талаар өөдрөг сайхан бодолтой байж, олон мэдээлэл өгсөнд баяртай байна. Уул уурхайн баялаг, мал аж ахуйн гаралтай түүхий эдийг ашиглахдаа аль болох нэмүү өртөг шингээн үйлдвэрлэл хөгжүүлэх бодлого баримталж байгаа. Үүнийг ойлгон дэмжиж байгаад баяртай байна.
Хоёр орны харилцаа, дээд удирдлагуудын тохиролцоог ажил хэрэг болгон урагшлуулахад байнга дэмжлэг үзүүлж байх болно.
Батлан хамгаалах, аюулгүй байдал, байгаль орныг хамгаалах чиглэлээр ч хамтын ажиллагааны төсөл хэрэгжиж байгаа нь сайшаалтай. Аль аль талдаа хууль ёсыг хатуу баримталж ажиллах нь чухал юм. Нам хоорондын хамтын ажиллагааг ч бэхжүүлэх хэрэгтэй байна. Хоёр орон хамтын ажиллагааны хүрээнд төдийгүй бүс нутаг, олон улсын тавцанд олон асуудлаар ижил буюу ойролцоо байр суурь баримталдаг. Цаашид олон улсын тавцанд бие биенээ дэмжиж ирсэн сайхан уламжлалаа үргэлжлүүлнэ гэдэгт итгэлтэй байна гэж Ерөнхийлөгч хэллээ.
Мөн хоёр тал улс орныхоо дотоод байдлын асуудлаар мэдээлэл солилцов.
