Монгол Улсын Ерөнхийлөгчийн Тамгын газрын дарга Д.Баттулга Нийслэлийн агаарын бохирдлыг бууруулах Үндэсний хорооны даргын хувьд хоёрдугаар цахилгаан станцыг түшиглэн баригдаж буй хагас коксон түлшний үйлдвэрийн ажлын явцтай өнөөдөр очиж танилцлаа.
“Аморе интернэйшнл” компанийн ерөнхий захирал Ж.Баатарсүрэн тус түлшний үйлдвэрийг барих ажлын явц хуваарийн дагуу үргэлжилж байгааг танилцуулав. Тэрээр “Зуухны ажил л хугацаанаасаа бага зэрэг хоцорч байгаа бусад нь хэвийн хэмжээнд байна. Арван нэгдүгээр сарын 15 гэхэд нэгдүгээр шугамын ажил дуусч, туршилтын бүтээгдэхүүн гаргаж эхэлнэ. Хоёр шугам бүрэн ажилд орох хугацаа 2012 оны 10 дугаар сарын нэгэн. Бүтээгдэхүүний үнэ нэг тонн нь 80-100 мянган төгрөг болох төлөвтэй. Хямдруулах талаас нь тооцож ажиллаж байна. Өртөг зардал өндөр болгож байгаа зүйл нь шингэн шил юм. Барьцалдуулахад сайн, тээвэрлэлтийн явцад чанараа алдахгүй гэсэн үүднээс технологидоо шингэн шилийг сонгосон. Нөгөөтэйгүүр шингэн шилийг өвөл тээвэрлэх боломжгүй. Иймээс шингэн шилний үйлдвэр барих бодолтой байна. Эхний ээлжинд шингэн шилийг үйлдвэр барьтал гадаадаас авч нөөцөлнө. 340 тонн шингэн шил нөөцлөх боломж бий. Тоног төхөөрөмжийн нийлүүлэлт 85 хувьтай байгаа. Хагас коксон түлшийг савлавал өртөг нь 3-10 хувиар өсөх байх. Энэ онд нөөцөлсөн түлшээрээ 6-7 мянган тонн хагас коксон түлш үйлдвэрлэнэ. Ажлын явцыг газар дээр нь үзүүлье” хэмээв.
Нийслэлийн агаарын бохирдлыг бууруулах Үндэсний хорооны дарга Д.Баттулга, Байгаль орчин, аялал жуулчлалын сайд Л.Гансүх нар танилцуулгын дараа зарим зүйлийг тодруулж асуулаа. Шингэн шилний нөөц дуусахаар 2012 оны эхний хагаст үйлдвэрлэл зогсох юм байна. Шингэн шил ахиу нөөцлөх, түүнийгээ дуусахаар эрдэнэшишийн крахмал, гурил зэргээр орлуулах технологийн өөр боломжийг судлах, одоо эртээс дулаанаа авч үйлдвэрийг ашиглалтад оруулах хугацааг наашлуулах, ОХУ-аас удахгүй ирэх түншүүдтэйгээ ярилцаж зохистой хувилбарыг сонгох, өртөг зардлыг бууруулах талаар анхаарч, гаалийн татварын төлбөрийн асуудлыг эргэж хянаж үзэх, шилний үйлдвэрийг барих тооцоо судалгаагаа гаргахыг үүрэг болголоо.
