Нью-Йорк хотноо болж байгаа НҮБ-ын Ерөнхий Ассамблейн 64-р чуулганд оролцож байгаа Монгол Улсын Ерөнхийлөгч Ц.Элбэгдорж өнөөдөр “Нью-Йорк Таймс” сонины нийтлэлч, зохиолч Томас Фрийдманыг хүлээн авч уулзлаа.
Т.Фрийдман бол “Дэлхий бөөрөнхий биш” номоороо монголчуудад танил болсон, олон улсад нэр хүндтэй нийтлэлч, эдийн засагч билээ.
Тэрээр Монгол Улсын талаар нийтлэл бичихээр төлөвлөж байгаагаа Ерөнхийлөгчид ярилаа. “Би Монгол орныг гайхамшигтай түүх, уламжлалтай орон гэж мэднэ. Танай оронд өрнөсөн ардчилал олон сайхан боломжуудыг авчирсныг мэднэ. Гэвч энэ бол миний монголын талаарх нийтлэлээ бичихэд хангалттай төсөөлөл биш. Ирэх жил ардчиллын 20 жилийн ой болно гэж сонссон. Тэр үеэр монголд заавал очих болно. Тэгээд дэлхий бөөрөнхий биш гэдгийг нотлох олон сайхан баримт монголоос олж харна гэдэгтээ итгэлтэй байгаа” гэлээ.
Монгол Улсын Ерөнхийлөгчтэй уулзаж байгаа завшааныг ашиглан, монголын уншигчдад халуун дотно мэнд дамжуулахыг хүсч байгаагаа тэрээр мөн хэлсэн.
Ноён Т.Фрийдман Монгол Улсын Ерөнхийлөгчтэй, монгол орны тухай, дэлхийн эдийн засгийн байдал, болон уур амьсгалын өөрчлөлтийн асуудлаар харилцан ярилцлаа.
Дараа нь тэрээр монголын хэвлэлийн төлөөлөгчдөд ярилцлага өгсөн.
“Би, аливаа улс орон хөгжихөд хамгийн хэрэгтэй байж болох дөрвөн зүйлийг өнөөдөр та бүхэнд хэлье. Энэ бол нэгдүгээрт “интернэтээс холбоотой байх” буюу мэдээллээс хоцрохгүй байх, хоёрдугаарт боловсрол, гуравдугаарт сайн засаглал, дөрөвдүгээрт эрүүл орчин” хэмээн “Нью-Йорк Таймс” сонины нийтлэлч, зохиолч Т.Фрийдман ярилцлагадаа дурдлаа.
Монгол Улсын Ерөнхийлөгч мөн өнөөдөр Ройтерс агентлагийн Азийг хариуцсан сурвалжлагч Пол Эккерттэй уулзаж, сонирхсон асуултуудад хариулт өглөө.
