Монгол Улсын Ерөнхийлөгчийн Тамгын газрын дарга Д.Баттулга Монголын оюутны холбооноос Сүхбаатарын талбайд өнөөдөр зохион байгуулсан “Оюутны тангаргийн баяр”-т урилгаар оролцов. Тэрээр Монгол Улсын Ерөнхийлөгч Ц.Элбэгдоржийн санаачлан боловсруулж, УИХ-аар батлуулсан “Дээд боловсролын санхүүжилт, суралцагчдын нийгмийн баталгааны тухай” хуулийн талаар оюутнуудад хандан товч үг хэлсэн юм.
Үгэндээ “Дээд боловсролын чанар, оюутны сургалтын төлбөр, цалин тэтгэлэг, нийгмийн баталгаа манай нийгмийн өмнө тулгамдсан томоохон асуудал мөн гэдгийг дурьдаад үүнийг шийдвэрлэх ёстой гэж Монгол Улсын Ерөнхийлөгч үзэж уг хуулийг батлуулсан. Одоо аттестатчилагдсан их, дээд сургуульд буй өдрийн ангийн оюутанд сургуулиа төгстөл сар бүр 70200 төгрөгийн цалин тэтгэлэг авах болно. Түүнчлэн онц, сайн сурдаг оюутанд урамшууллын тэтгэлэг өгнө. Бас орон нутгийн мэргэжилтэй ажилтны хэрэгцээг хангах зорилгоор нутгийн захиргааны байгууллага нь өөрийн аймаг, сумаас суралцаж буй оюутанд санхүүгийн дэмжлэг үзүүлнэ. Үүний зэрэгцээ хуульд заасны дагуу оюутны нийгмийн асуудлыг шийдвэрлэх юм” гэв.
