Монгол Улсын Ерөнхийлөгч Ц.Элбэгдоржийн урилгаар манай улсад айлчилсан Бүгд Найрамдах Финланд Улсын Ерөнхийлөгч хатагтай Тарьяа Халонены айлчлал амжилттай өндөрлөлөө. Тэрээр айлчлалынхаа хүрээнд Монгол Улсын Ерөнхийлөгч Ц.Элбэгдоржтой уулзаж хоёр орны харилцаа хамтын ажиллагааны талаар ажил хэрэгч санал солилцож, ардчиллыг бэхжүүлэх чиглэлээр олон улсын тавцанд идэвхитэй хамтран ажиллах тухай Монгол Улсын Ерөнхийлөгчийн санаачилгыг дэмжсэн.
Мөн өргөтгөсөн хэлэлцээр хийж, хамтын ажиллагааг хөгжүүлэх чиглэлээр зарим тодорхой асуудлаар тохиролцлоо.
Түүнчлэн Бүгд Найрамдах Финланд Улсын Ерөнхийлөгч хатагтай Тарьяа Халонен Монгол Улсын Их хурлын дарга Д.Дэмбэрэл, Монгол Улсын Ерөнхий сайд С.Батболд, Хүний эрхийн үндэсний комиссийн дарга Ж.Бямбадорж нартай уулзаж, Монгол Финландын бизнес форумд оролцож , МУ-ын Геологийн төв лаборатори, Финланд Улсын геологийн албатай хамтран байгуулсан лабораторийн төвийн нээлтэд оролцлоо.
Хатагтай Тарьяа Халонен, түүний нөхөр ноён Пентти Араяарви нарыг хүндэтгэн зохион байгуулсан бэсрэг наадмыг үзэж сонирхсоноор түүний айлчлал өндөрлөлөө.
Ерөнхийлөгч Тарьяа Халонен үдэлтийн уулзалтын үеэр халуун дотноор хүлээн авсан монголын ард түмэнд талархаж байгаагаа илэрхийлээд хоёр орны харилцаа хамтын ажиллагааг хөгжүүлэхийн төлөө чармайн ажиллах болно гэлээ. Тэрээр мөн Монгол Улсын Ерөнхийлөгч Ц.Элбэгдоржийн гаргасан ардчиллын боловсролыг дэлгэрүүлэх санаачилгыг дэмжиж ажиллах болно гэдгээ дахин илэрхийллээ.
