Монгол Улсын Ерөнхийлөгч Ц.Элбэгдоржид ХБНГУ-аас Монгол Улсад суух Онц бөгөөд Бүрэн эрхт Элчин сайд Петер Шалер өнөөдөр итгэмжлэх жуух бичгээ өргөн барилаа. Итгэмжлэх жуух бичиг өргөн барьсантай холбогдуулан Ерөнхийлөгч Элчин сайдыг хүлээн авч уулзав.
Ерөнхийлөгч хэлэхдээ “ХБНГУ бол Монгол Улсын Европ дахь гол чухал түнш. Монгол Улс, ХБНГУ-ын хооронд иж бүрэн түншлэлийн харилцаа амжилттай хөгжиж байгаад сэтгэл ханамжтай байдаг. Монголын олон мянган хүн германд боловсорч, янз бүрийн салбарт амжилттай ажиллаж байна. ХБНГУ манай орны ардчилсан өөрчлөлт, шинэчлэлийг шилжилтийн бүр эхний жилүүдээс дэмжин тусалж, томоохон хувь нэмрээ оруулсан орон” хэмээн онцлон дурьдаад хоёр орны харилцааг улам өргөжүүлэхэд Элчин сайдын хувь нэмэр их байх болно гэдгийг тэмдэглэлээ.
Ерөнхийлөгч уул уурхай, дэд бүтэц гээд хамтран ажиллах нөөц боломж их байгааг өгүүлэхийн сацуу боловсролын салбар дахь уламжлалт хамтын ажиллагааг цаашид өргөжүүлэх талаар ярихдаа Монгол-Германы хамтарсан их сургууль байгуулах санал тавилаа. ХБНГУ-ын Канцлер А.Меркелийн манай оронд хийх айлчлалын үеэр эл асуудлыг ярилцан тохиролцох бодолтой байгаагаа мөн хэлэв.
