Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдорж Таван толгойд өнөөдөр болсон Монгол Улс, Оросын Холбооны Улсын зэвсэгт хүчний хамтарсан хээрийн сургуулийг үзэв. Олон улсын терроризмтой тэмцэх ажиллагаа явуулах “Сэлэнгэ-2011” хээрийн сургуулийн талаар Ерөнхийлөгчид Зэвсэгт хүчний жанжин штабын дэд дарга хошууч генерал Д.Баярмагнай дэлгэц дээр танилцууллаа. Дараа нь хээрийн сургуулийн ажиллагаа эхэлж, их буун дуу нүргэлж, дарийн утаа энд тэндгүй манарав.
Хилийн бүсэд мансууруулах бодис хууль бусаар нэвтрүүлэн наймаалалцахаар ирсэн зэвсэгт бүлэглэлийг устгахаар монголын 700, оросын 250 цэргийн албан хаагч, мото буудлагын рот бүхий холимог дивиз өөр өөрийн нутагт хоёр талын хамтарсан ажиллагаагаа эхэлж буй нь энэ юм. Зэвсэгт бүлэглэлийг хоёр улсын хилийн бүсэд устгах ажиллагааг нэгэн зэрэг их бууны галаар дэмжүүлэн танк, явган цэргийн байлдааны бусад машинаар дайрч, тэднийг зугтмагц агаараас десант буулган бүсэлж байгаагаар харууллаа.
Энэ ажиллагаа нь хоёр орны хооронд байгуулсан гэрээ хэлэлцээрүүдийг хэрэгжүүлэх, зэвсэгт хүчнүүдийн хамтран ажиллах дадлага туршлагыг дээшлүүлэх, дайчин нөхөрлөлийг нь бэхжүүлэхэд ихээхэн ач холбогдолтойг хээрийн сургуулийн командлагч хошууч генерал Д.Баярмагнай тэмдэглэж байв.
