НҮБ-ын Ерөнхий Ассамблейн 64 дүгээр чуулганы Ерөнхий шүүмжлэл, Уур амьсгалын өөрчлөлтийн асуудлаарх НҮБ-ын Дээд хэмжээний уулзалтад оролцохоор Нью-Йорк хотноо хүрэлцэн ирсэн Монгол Улсын Ерөнхийлөгч Ц.Элбэгдорж 2009 оны 9 дүгээр сарын 21-ний өдөр НҮБ-ын Ерөнхий нарийн бичгийн дарга Бан Ги Мүнтэй НҮБ-ын төв байранд уулзав. Уулзалтад Мыонгол Улсаас НҮБ-ын дэргэд суугаа Байнгын төлөөлөгч О.Энхцэцэг, Гадаад харилцааны дэд сайд Б.Болор, Ерөнхийлөгчийн Гадаад бодлогын зөвлөх Ц.Сүхбаатар, НҮБ-ын талаас НБДГ-ын Тамгын газрын дарга Вижай Намбиар, Улс төрийн асуудал хариуцсан ЕНБД-ын орлогч Лин Паско, Бодлого төлөвлөлтийн асуудал хариуцсан туслах ЕНБД Роберт Орр зэрэг албаны хүмүүс байлцав.
Уулзалтын үеэр хоёр тал Мянганы хөгжлийн зорилтууд, энхийг сахиулах үйл ажиллагаа, далайд гарцгүй хөгжиж буй орнууд, уур амьсгалын өөрчлөлт, цөмийн зэвсгийг хураах зэрэг Монгол Улс, НҮБ-ын хамтын ажиллагааны өргөн хүрээний асуудлыг хөндөж ярив.
Түүнчлэн Ерөнхий нарийн бичгийн дарга Бан Ги Мүний санаачилгаар 2009 оны 9 дүгээр сарын 22-нд НҮБ-ын төв байранд зохиогдох Уур амьсгалын өөрчлөлтийн асуудлаарх дээд хэмжээний уулзалтын талаар дэлгэрэнгүй санал солилцов. Монгол Улсын Ерөнхийлөгч Ц.Элбэгдорж тус дээд хэмжээний уулзалтын хүрээнд зохиогдох дугуй ширээний ярилцлагыг Европын Комиссын Ерөнхийлөгч Хосе Мануэль Барросотой хамт даргалах юм.
Монгол Улсын Ерөнхийлөгч Ц.Элбэгдорж Монгол Улс НҮБ-ын энхийг сахиулах Чад дахь ажиллагаанд батальон илгээх шийдвэр гаргасныг мэдэгдэж, улмаар НҮБ-ын энхийг сахиулах ажиллагаанд цэрэг илгээгч томоохон 20 орны тоонд Монгол Улс багтах болохыг онцлон тэмдэглэв. Тэрээр мөн энхийг сахиулах ажиллагааны асуудлаар Улаанбаатар хотноо олон улсын уулзалтыг зохион байгуулах саналтай байгаагаа илэрхийлэв.
Ерөнхий нарийн бичгийн дарга Бан Ги Мүн Мянганы хөгжлийн зорилтуудыг хэрэгжүүлэх, цөмийн зэвсгийг хураах, үл дэлгэрүүлэх, далайд гарцгүй хөгжиж буй орнуудын хүндрэл бэрхшээлийг даван туулах асуудлаар Монгол Улсын гаргаж буй идэвх чармайлтыг өндрөөр үнэлж, НҮБ-ын зүгээс дэмжлэг туслалцаа үргэлжлүүлэн үзүүлэхээ нотлов. НҮБ-ын ЕНБД 2010 онд Нью-Йорк хотноо болох Мянганы хөгжлийн зорилтуудын хэрэгжилтийг хянах дээд хэмжээний уулзалтад Ерөнхийлөгч Ц.Элбэгдоржийг оролцохыг урилаа.
ЕНБД Бан Ги Мүн өнгөрсөн 7 дугаар сард Монгол Улсад айлчлах үеэр нээгдсэн Далайд гарцгүй хөгжиж буй орнуудын олон улсын судалгааны төвийн үйл ажиллагааг дэмжих чиглэлийг холбогдох албаны хүмүүст даалгасныг мэдээлэв.
Монгол Улсын Ерөнхийлөгч Ц.Элбэгдорж Монгол Улсын Мянганы хөгжлийн зорилтуудын хэрэгжилтийн явц болон уур амьсгалын өөрчлөлт манай оронд хэрхэн нөлөөлж буйг товч танилцуулж, түүнийг шийдвэрлэхэд олон талт хамтын ажиллагааг нэмэгдүүлэн ажиллахад онцгой анхаарч буйг тэмдэглэлээ.
Ерөнхийлөгч, НҮБ-ын Хүрээлэн буй орчны хөтөлбөрийн дэд бүсийн төвийг Монголд нээх нь Зүүн Хойд Азийн орнуудын уур амьсгалын өөрчлөлт, хүрээлэн буй орчны хамтын ажиллагаанд чухал хувь нэмэртэй болохыг тэмдэглэв.
Уулзалтын төгсгөлд Ерөнхийлөгч Ц.Элбэгдорж хүндэт зочны дэвтэрт гарын үсэг зурлаа.
