Батлан хамгаалах асуудал эрхэлсэн Төрийн захиргааны төв байгууллагын 100 жилийн ойд
Эрхэм хүндэт генерал, офицер, ахлагч, ажилтан, чөлөөнд байгаа ахмадууд аа!
Монголын Тулгар төрийн 2220 жил, Их Монгол Улс байгуулагдсаны 805 жил, тусгаар тогтнолоо сэргээн тогтоосон Үндэсний эрх чөлөөний хувьсгалын 100 жил, Ардын хувьсгалын 90 жилийн түүхэн ойнууд тохиосон жил миний бие Монгол Улсын Ерөнхийлөгч, Зэвсэгт хүчний Ерөнхий Командлагчийн хувьд эдүгээ 100 жилийн түүхт ойгоо тэмдэглэж буй Та бүхэнд чин сэтгэлийн халуун мэнд хүргэе.
Олноо өргөгдсөн Монгол Улсын анхны таван яамны нэг Цэргийн хэргийг бүгд захиран шийтгэгч яам буюу өнөөгийн Батлан хамгаалах яам 100 жилийн түүхэн хугацаанд улс орны тусгаар тогтнолыг сэргээн тогтоох, хамгаалан бэхжүүлэх, үе үеийн төрийн цэргийн бодлого болон цэргийн шинэчлэлийн зорилтыг боловсруулан хэрэгжүүлэх, Зэвсэгт хүчнийг хөгжүүлэн чадваржуулах үйл хэргийн гол тулгуур болж ирсэн билээ. Батлан хамгаалах салбарын бие бүрэлдэхүүн Та бүхэн эх орны энх цагийн бүтээн байгуулалт, хөгжил дэвшилд ихээхэн хувь нэмэр оруулан түүхт их ойгоо хөдөлмөр бүтээлийн өндөр амжилтаар угтан золгож байгаад Төрийн тэргүүн миний бие баяртай байна.
Арван арваныг өртөөлөхдөө Та бүхний дундаас Монгол эх орныхоо төлөө алтан амиа үл хайрлан баатарлагаар тэмцсэн эрэлхэг дайчид, эрдэм мэдлэгтэй цэргийн мэргэжилтнүүд, эр зориг, авхаалж самбаа, мэргэжлийн ур чадвараараа ард түмэндээ хүндлэгдсэн алдартан, гавъяатнууд олноор төрөн гарч байгууллагынхаа нэр төрийг өндөрт өргөж яваа нь Батлан хамгаалах салбарын бахархал юм.
Шинэ цагийн эрх зүйт төрийн Батлан хамгаалах яам орон нутгийн хамгаалалтад тулгуурласан батлан хамгаалах улс төр, эдийн засаг, нийгэм, эрх зүй, цэргийн нэгдмэл тогтолцоог бүрдүүлж, Зэвсэгт хүчнийг мэргэжлийн чиг баримжаатай, чадварлаг болгон хөгжүүлж улс орны тусгаар тогтнол, нутаг дэвсгэрийн бүрэн бүтэн байдлыг хангана гэдэгт итгэж байна.
Монгол цэргийн золбоо, хийморь Эзэн Богд Чингис хааны Цэргийн Их хар сүлдний сүр хүч дор үеийн үед мандан бадрах болтугай.
МОНГОЛ УЛСЫН ЕРӨНХИЙЛӨГЧ,
ЗЭВСЭГТ ХҮЧНИЙ ЕРӨНХИЙ КОМАНДЛАГЧ ЦАХИАГИЙН ЭЛБЭГДОРЖ
2011 оны 9 дүгээр сарын 8 Улаанбаатар хот
