Монгол Улсын Ерөнхийлөгч Ц.Элбэгдорж Япон Улсаас тус улсад суугаа Онц бөгөөд Бүрэн эрхт Элчин сайд Т.Кидокорог эх орондоо бүр мөсөн буцах гэж байгаатай нь холбогдуулан өнөөдөр хүлээн авч уулзлаа.
Ерөнхийлөгч Ц.Элбэгдорж хэлэхдээ элчин сайд Кидокорогийн ажилласан хоёр жил гаруйнхны бага хугацаанд Монгол, Японы харилцаанд томоохон дэвшил гарсныг дурьдаад стратегийн түншлэлийн зарчмаар харилцааг хөгжүүлэхээр тохиролцож, эдийн засгийн түншлэлийн хэлэлцээр байгуулах үйл явцыг эхлүүлснийг онцлон тэмдэглэв. Мөн 2012 онд хоёр орны хооронд дипломат харилцаа тогтоосны 40 жилийн ой болох бөгөөд энэ ойн хүрээнд Япон Улсын Цог Жавхлант Эзэн хаан, парламентын Төлөөлөгчдийн танхимын дарга, Ерөнхий сайд нарыг Монгол Улсад айлчлуулах сонирхолтой байгаагаа Ерөнхийлөгч илэрхийллээ.
-Элчин сайд таны томилолтын хугацаа дуусч буй ч Монголтой харилцах, хамтран ажиллах үйл явцад оролцоно гэдэгт итгэж байна. Стратегийн түншлэлийн харилцаа хөгжүүлэх тухай Хамтарсан мэдэгдлийн агуулгыг бодит ажил хэрэг болгох зорилгоор хоёр тал дунд хугацааны нарийвчилсан төлөвлөгөө хамтран боловсруулах, эдийн засгийн хамтын ажиллагааг эрдэс баялаг, ашигт малтмалын салбарт төдийгүй дэд бүтэц, эрчим хүч, мал аж ахуй, газар тариалангийн чиглэлээр эрчимжүүлэх шаардлагатай байна. Дулааны цахилгаан станц бариулах монголыг талын хүсэлтийг анхаарна гэдэгт найдаж байна хэмээн Ерөнхийлөгч хэлээд элчин сайдын цаашдын ажилд амжилт хүсэв.
Элчин сайд Т.Кидокоро Монгол Улсад гурван удаа ирж нийт найман жил ажилласнаа дурьдаад томилолтын хугацаа амжилттай, үр дүнтэй байснаа өгүүллээ.
