(НҮБ-ын Ерөнхий Ассамблейн 64-р чуулганы Ерөнхий санал, шүүмжлэл эхэллээ.)
“Хэрвээ улс орнууд нэгдэж чадвал хүн төрөлхтөний өмнө тулгараад байгаа асуудлыг шийдвэрлэж чадна” хэмээн НҮБ-ын Ерөнхий нарийн бичгийн дарга Бан Ги Мүүн өнөөдөр НҮБ-ын Ерөнхий Ассамблейн 64-р чуулганы Ерөнхий санал шүүмжлэлийн нээлтэн дээр хэллээ.
“Одоо Нэгдсэн Үндэстний байгууллага “нэгдмэл” байх цаг нь болсон” хэмээн тэрээр дэлхийн 130 гаруй орны төр засгийн тэргүүнүүдэд хандаж онцолсон юм. Уур амьсгалын өөрчлөлт-дэлхийн хүн төрөлхтөний өмнө тулгарч буй гол бэрхшээлүүдийн нэг болоод байгаа энэ цаг үед асуудлыг шийдвэрлэхийн төлөө хэлэлцэж, тодорхой шийдвэр гаргах цаг нь болсон гэдгээ орон орны удирдагч өчигдөр илэрхийлсэн билээ. Энэ нь Копегагенд ирэх 12-р сард уур амьсгалын асуудлаар болох Дээд хэмжээний уулзалт зорилгоо биелүүлж чадна гэсэн итгэл найдварыг төрүүлж байна хэмээн ноён Бан Ги Мүн мөн хэллээ.
Уур амьсгалын өөрчлөлтөөс гадна, хүнсний гачигдал, эрчим хүч, нийтийг хамарсан өвчлөл зэрэг асуудлуудаар ч мөн тодорхой шийдвэр гаргах хэрэгтэй байгааг НҮБ-ын Ерөнхий нарийн бичгийн дарга онцоллоо.
Ийнхүү НҮБ-ын Ерөнхий Ассамблейн 64-р чуулганы Ерөнхий санал, шүүмжлэл эхэллээ. Чуулганд оролцож байгаа 130 гаруй орны төр засгийн Тэргүүн, дэлхий дахины болон бүс нутгийн тулгарч байгаа асуудал, түүнийг хэрхэн даван туулах талаар өөрсдийн санал бодлоо хэлж байна. Монгол Улсын Ерөнхийлөгч Ц.Элбэгдорж 9-р сарын 25-ны Баасан гаригт Ерөнхий шүүмжлэлд үг хэлэх болно.
