Монгол Улсын Ерөнхийлөгч Ц.Элбэгдорж есдүгээр сарын 15-д болсон “Балдорж” шагнал гардуулах ёслолд оролцон, шилдгийн шилдгээр шалгарч тэргүүн байр эзэлсэн “Өдрийн сонин”-ы нийтлэлч Ж.Гангаад шагналыг нь гардуулан баяр хүргэлээ. Түүнчлэн 15 жилийн ойгоо тэмдэглэж буй “Өнөөдөр” сонины хамт олон, “Балдорж” шагналын дэд байрт болон шилдэг аравт авьяас чадвар, нийтлэлээрээ шалгарсан сэтгүүлчдэд баяр хүргэв.
Ерөнхийлөгч хэлэхдээ “Сайн хүнтэй дурсамжаа холбохыг хүн бүхэн боддог. Муу зүйлтэй нэрээ ч холбохыг хүсдэггүй. Энэ өдрүүдэд “Өнөөдөр” сонины 15 жилийн ой болж, олон хүн Балдорж гэж хүний тухай дурсамжаа дэлгэн нийтэлж, ярилцсаныг харсан. Үнэхээр Балдорж бол сайн хүн байсан гэдгийг энд хэлье гэж бодож байна. 1996 онд УИХ-ын нэгэн хуралдааныг даргалсан дурсамж санаанд орж байна. Тэр өдөр УИХ-ын дарга байхгүй, дэд даргын хувьд би хуралдааныг даргалсан юм. “Ардын эрх” сонины тухай хэлэлцэж, хамгийн их маргаантай, хамгийн их хүнд хуралдаан болсон. Тэр өдрийн маргааныг хараад сууж байсан олон хүний уур хүрсэн байх гэж бодсон. Нэг хүнийг ажлаас өөрчилж байна гэсэн чинь нэг хэсэг хүнийг ажилтай болгож байснаа тухайн үед мэдээгүй. Арван таван жилийнхээ ойг тэмдэглэж буй “Өнөөдөр” сонин тэр хуралдааны дараагаар мэндэлсэн. “Өнөөдөр” сонин бол анхны чөлөөт өдөр тутмын сонин. Мөн 25 суваг телевиз байна. Монголын анхны чөлөөт телевиз гэсэн нэртэйгээр тэр үед нээгдэж байсан. Тэгэхээр чөлөөт хэвлэлийн маш их хүчирхэг гэр бүл мэндэлж байжээ. “Ардын эрх” сонины үйл ажиллагааг зогсоолоо гэж тэр үед олон хүн надад дургүй байсан болов уу.
Одоо олон хүн дуртай болсон байх аа. Ийм хүчирхэг гэр бүл, ийм хүчирхэг чөлөөт хэвлэлийн армийг бэлтгэхэд тэр шийдвэр хүргэжээ. Үүнийг хэлье гэж бодлоо. Манайд мэргэшсэн, үнэт зүйлдээ үнэнч сэтгүүлчид, сэтгүүл зүй улам дэлгэрэх болтугай гэж ерөөмөөр байна. Хэвлэлийн эрх чөлөөний хууль санаачилж, УИХ-аар хэлэлцүүлэхээр төлөвлөж байгаа. Сэтгүүлч нөхөд маань олон удаа санал бодлоо хэлсэн. Саналаа улам дэлгэрүүлж өгөөсэй гэж хүсч байна. УИХ-ын энэ удаагийн чуулганы ажил маш их байна. Тиймээс энэ хуулийг батална гэдэгт эргэлзэж л байгаа. Гэхдээ дараагийн чуулган гэж бий учраас энэ хуулийг гаргачих юмсан гэсэн бодол байна. Үгийнхээ эхэнд би “Сайн хүнтэй дурсамжаа холбохыг хүн бүхэн боддог. Муу зүйлтэй нэрээ ч холбохыг хүсдэггүй” гэж хэлсэн. Тэгэхээр сайн сэтгүүлч байхын тулд сайн хүн байх ёстойг та бүхэн харж байгаа болов уу гэж бодож байна. Энэ сайхан арга хэмжээг би бас хүлээдэг болжээ. Намартаа ийм арга хэмжээ болдог. Сэтгүүлч нөхөдтэйгөө уулзах боломж гардаг.
Сэтгүүл зүйн авьяастай, алдартай ийм хүмүүсийг тодруулахыг харж суудаг. Та бүхний хийсэн нэвтрүүлэг, бичсэн олон зүйл монголын нийгмийг анагаахад асар их үүрэг гүйцэтгэж байгаа гэдгийг хэлэх нь зүйтэй хэмээн бодож байна” гэв.
