Монгол Улсын Ерөнхийлөгч Ц.Элбэгдорж зарлиг гарган, мал аж ахуйн салбарт олон жил үр бүтээлтэй ажилласан хөдөлмөрийг нь үнэлэн зарим хүнийг төрийн өндөр цол, одон, медалиар шагнасан юм. Уг шагналыг Ерөнхийлөгчийн Тамгын газрын дарга Д.Баттулга төрийн ордонд өнөөдөр гардууллаа.
Тэрээр ХХААХҮЯ-ны Стратегийн төлөвлөлт, бодлогын газрын ахлах мэргэжилтэн Пагвын Доржсүрэнд Монгол Улсын малын гавьяат эмч цол, тэмдэг, Дундговь аймгийн Сайнцагаан сумын “Ирээдүй” мал эмнэлгийн нэгжийн захирал Лааганы Хүүхэнмөнхөд Хөдөлмөрийн гавьяаны улаан тугийн одон, Хөдөө аж ахуйн их сургуулийн харъяа мал эмнэлэг, биотехнологийн сургуулийн захирал Пэлдэнгийн Болормаа, Дархан-Уул аймгийн Шарын гол сумын мал эмнэлэг, үржлийн тасгийн дарга Базарсадын Ширчинсүрэн, Архангай аймгийн мал эмнэлгийн албаны дарга Самбуугийн Эрдэнэчимэг нарын 12 хүнд Алтан гадас одон, Хэнтий аймгийн мал эмнэлгийн газрын халдвартын их эмч Дамбадаржаагийн Дэмбэрэлваанчиг, Булган аймгийн мал эмнэлгийн албаны лаборант, малын бага эмч Дугарын Батцэцэг нарын 7 хүнд Хөдөлмөрийн хүндэт медаль гардуулж, мал эмнэлгийн болон үржлийн салбарт зориулсан олон жилийнхээ хөдөлмөрийг төрөөрөө, Ерөнхийлөгчөөрөө үнэлүүлсэнд баяр хүргэв.
