“Малын эмч нарын улсын зөвлөлгөөн”-д îðîëöîã÷äîä
Малын эмч нарын улсын зөвлөлгөөнд оролцож байгаа эрхэм хүндэт зочид, төлөөлөгчид, хатагтай, ноёд оо! Монгол түмний нандин шүтээн буянт мал сүргийнхээ эрүүл мэндийг хамгаалан, шилжилтийн үеийн ээдрээ нугачаанд бүдрэлгүй, халуунд халж, хүйтэнд хөрөхөөс үл шантран, эзэмшсэн мэргэжилдээ сэтгэлээ зориулан ажиллаж байгаа малын эмч Та бүхэндээ Монгол Улсын Ерөнхийлөгч миний бие чин сэтгэлийн талархал илэрхийлж байгааг хүлээн авна уу.
Монгол Улсын эдийн засаг огцом өсөж, үсрэнгүй хөгжлийн “хурдны зам”-ын гараан дээр байгаа энэ үед буянт малын эрүүл мэндийн манаанд зогсож байгаа малын эмч нарын улсын зөвлөлгөөнийг ХХААХҮЯ-наас санаачлан зохион байгуулж байгаа нь цаг үеэ олсон чухал арга хэмжээ болж байна.
“Монгол мал” хөтөлбөрийг Засгийн газар, ХХААХҮЯ-наас санаачилж УИХ-аас баталсан нь мал эмнэлгийн салбарын тогтолцоог боловронгуй болгох, материаллаг баазыг бэхжүүлэх, улмаар монгол мал, мах, махан бүтээгдэхүүнийг дэлхийн түвшинд хүлээн зөвшөөрөгдөх эхлэлийг тавилаа.
2008-2010 онуудад мал эмнэлгийн арга хэмжээний нийт санхүүжилт жилд дунджаар 6,5 тэрбум төгрөг байсан бол 2011 онд 21,3 тэрбум төгрөгт хүрч даруй 3,5 дахин өссөн нь энэ салбарыг хөгжүүлэхэд үйлсэд чухал түлхэц болох “Монгол мал” хөтөлбөр батлагдсаны үр дүн гэж үзэж байна.
Мал эмнэлгийн нэгдсэн арга хэмжээний төсөв ийнхүү хэд дахин өсөөд байхад хувийн мал эмнэлгийн нэг байгууллагад сард дунджаар 380 мянган төгрөгийн мал эмнэлгийн үйлчилгээний хөлс ногдож байна. Санхүүгийн хомс байдал нь малын эмчийн мэргэжил эзэмших, эзэмшсэн мэргэжлээрээ ажиллах сонирхлыг бууруулна. Мөн хувийн хэвшлийн мал эмнэлгийн байгууллагууд тогтвортой ажиллах боломжгүйд хүрч, малын халдварт болон гоц халдварт өвчнөөс урьдчилан сэргийлэх ажил чанаргүй хийгдэх муу үр дагавартай юм. Үүнээс шалтгаалан вакцинжуулсан бүс нутагт халдварт өвчин гарах зэргээр давхар, давхар хор хохирол гарсаар байгааг малын эмч нар байнга ярьж сануулсаар байна. Малын эмч, мэргэжилтнүүдийн зүй ёсны энэ анхааруулгад төр засгийн бүх шатны байгууллагууд онцгой анхаарал тавьж асуудлыг цаг алдалгүй шийдвэрлэх хэрэгтэй. Мөн 2012 оны төсвийн жилээс эхлэн мал эмнэлгийн үйлчилгээний үнэ тариф, санхүүжилтийг нэмэгдүүлэх талаар холбогдох хууль тогтоомжуудад тодорхой өөрчлөлт оруулах, хэрэгжилтийг хангахын төлөө ХХААХҮЯ анхаарч ажиллах нь зүйтэй.
Мал эмнэлгийн үйлчилгээний ажлын чанар, хариуцлагыг сайжруулж, хувийн хэвшлийн мал эмнэлгийн байгууллагуудын тогтвортой үйл ажиллагааг бэхжүүлэх, малын эмч нарын чадавхийг сайжруулах, энэ чиглэлээр мэргэжил эзэмших сонирхлыг хөхиүлэн дэмжих нь Монгол төрийн бодлогын тэргүүн зорилт байх ёстой гэж Төрийн тэргүүний хувьд үзэж байна.
Эрхэм төлөөлөгчид өө!
Эрдэнэт мал сүргийнхээ эрүүл мэндийг хамгаалах үйлсэд төрийн бодлогыг оновчтой чиглүүлж, төсвийн хөрөнгийг үр ашигтай хуваарилж, ажил үйлчилгээний чанарыг нэмэгдүүлэхийн төлөө хамтран ажиллаж Монгол Улсаа хөгжүүлцгээе.
Сайн үйлс дэлгэрэх болтугай.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2011 оны 9 дүгээр сарын 17-ны өдөр
Улаанбаатар хот
