НҮБ-ын Ерөнхий Ассамблейн 66 дугаар чуулганы хүрээнд яригдаж байгаа томоохон сэдвүүдийн нэг нь халдварт бус өвчнөөс урьдчилан сэргийлэх асуудал болж байна. Өнөөдөр энэ сэдвээр 30 орны төр засгийн тэргүүн, 100 орчим орны сайд нарын хэмжээнд дээд хэмжээний уулзалт болов.
Уг уулзалтад Монгол Улсыг төлөөлж Тэргүүн хатагтай , “Итгэл-Хавдаргүй Монгол” сангийн тэргүүн Х.Болормаа, Эрүүл мэндийн сайд С.Ламбаа, МСС-гийн Эрүүл мэндийн төслийн захирал А.Мөнхтайван болон албаны бусад хүн оролцлоо.
Өнөөдөр дэлхий дээр халдварт бус өвчнөөр амиа алдагдсын тоо 36 сая хүрч, нийт нас барагсдын 63 хувийг эзэлж, энэ тоо улам бүр өсөх хандлагатай байна. Тэр дундаа зүрхний шигдээс, хавдар, чихрийн шижин болон амьсгалын замын өвчлөл нэмэгдэж байгааг НҮБ-аас гаргасан албан ёсны тоо баримтад дурьджээ.
Дээд хэмжээний уулзалтад НҮБ-ын Ерөнхий нарийн бичгийн дарга ноён Бан Ги Мүн хэлэхдээ “Ирэх10 жилийн хугацаанд халдварт бус өвчний улмаас нас барагдсын тоо дунджаар 17 хувиар нэмэгдэх хандлагатай байгааг Дэлхийн эрүүл мэндийн байгууллага тооцоолжээ. Ялангуяа ядуу буурай орнууд, нийгмийн эмзэг бүлгийнхэн эдгээр өвчинд нэрвэгдэж байна. Халдварт бус өвчлөл хэдэн сая өрхийн амьжиргаанд эдийн засгийн асар их дарамт учруулж байна” гээд шийдвэр гаргагчдад хандан өвчлөлийн тоог бууруулах талаар нэгдэж ажиллахыг уриаллаа. Эрүүл бус хооллолт, хөдөлгөөн дутагдал, идэвхгүй амьдралд дайн зарлаж байгаагаа НҮБ-ын индэр дээрээс мэдэгдэж, үйлдвэрлэгчид, хэвлэл мэдээллийнхнийг дэмжихийг хүсэв.
Дэлхийн эрүүл мэндийн байгууллагын Ерөнхий захирал Др. Маргарет Чан, НҮБ-ын Ерөнхий Ассамблейн чуулганы дарга Нассир Абдулазиз Нассер, Олон улсын хавдрын хяналтын холбоог төлөөлж Эрхэмсэг гүнж Дина Миред нар мөн үг хэлсэн.
Монгол Улсын Эрүүл мэндийн сайд С.Ламбаа үг хэлж, зарим тодорхой санал санаачилга дэвшүүлэв.
Манай улс 2009 оноос АНУ-ын мянганы сорилтын сангийн буцалтгүй тусламжаар 39.1 сая ам. долларын төслийг “Халдварт бус өвчин, осол гэмтлээс урьдчилан сэргийлэх” чиглэлээр хэрэгжүүлж байна. Энэ бол “Халдварт бус өвчнөөс сэргийлэх, хянах үндэсний хөтөлбөр”-ийн хэрэгжилтийг эрчимжүүлж, өвчний эрт илрүүлэлтийн хувийг нэмэгдүүлж, хүн амын нийгмийн эрүүл мэндийн боловсрол болон эмнэлгийн мэргэжилтнүүдийн чадавхийг дээшлүүлэхэд чиглэсэн томоохон хөрөнгө оруулалт болсон юм.
Халдварт бус өвчний асуудалд олон улсын хамтын нийгэмлэг өөрийн анхаарлыг хандуулж, өндөр түвшинд авч хэлэлцэж, цаашид авч хэрэгжүүлэх арга хэмжээний талаар Улс төрийн тунхаглал гаргахаар ажиллаж байгааг НҮБ-ын нийт гишүүн орнууд сайшаан дэмжиж байна.
