Азийг сурталчлах, дэмжих чиглэлд АНУ-д төдийгүй дэлхийд хамгийн идэвхтэй үйл ажиллагаа явуулдаг байгууллага болох Азийн нийгэмлэг Монгол Улсын Ерөнхийлөгч Ц.Элбэгдоржид хүндэтгэл үзүүлэх арга хэмжээ зохион байгууллаа. Тус нийгэмлэгээс 2011 оны “Төрийн гарамгай зүтгэлтэн” шагналаа ардчиллыг бэхжүүлэх, хүний эрхийг хангах, шударга ёсыг баталгаажуулах, байгаль хамгаалах талаар санаачилгатай, амжилттай ажилласны нь үнэлж Ерөнхийлөгч Ц.Элбэгдоржид олгож байсан юм.
Уг хүндэтгэлийн зоогийн арга хэмжээг нээж Азийн нийгэмлэгийн гүйцэтгэх дэд ерөнхийлөгч Ж.Митцл хэлэхдээ “Өнөөдөр дэлхий даяараа Монгол руу анхаарлаа хандуулж байна. Анхаарлаа хандуулах гурван шалтгаан байгаа. Нэгдүгээр шалтгаан бол монголчуудын үнэт зүйл нь ардчилал, хүний эрхийг дээдэлдэг улс орнуудын үнэт зүйлстэй ижил юм. Хоёрдугаарт монголчууд бол гайхалтай ард түмэн. Гуравдугаарт энэ улсын асар их байгалийн нөөц баялаг юм. Ийм гурван шалтгаанаар бид Ерөнхийлөгч Ц.Элбэгдоржийг өнөөдрийн хүндтэй зочноор сонголоо” гэв.
Ерөнхийлөгч Ц.Элбэгдорж дараа нь Монгол Улсын ардчилал, тогтвортой хөгжлийн сэдвээр илтгэл тавьж, оролцогчдын сонирхсон асуултад хариуллаа.
Монголын ардчиллын онцлогийн тухай асуултад “...Монголчууд зах зээлийн эдийн засаг, нийгмийн шилжилтийг нэгэн зэрэг, дусал цус урсгахгүйгээр тайван замаар хийж чадсан. Өнөөдөр монголын ардчилал бүс нутагтаа, олон оронд үлгэр жишээ болж байна. Ардчилсан хувьсгал хийж байх тэр үед хэрвээ 20 жилийн дараа монголчууд Ардчилсан орнуудын хамтын нийгэмлэгийг даргална гэж хэлсэн бол хэн ч итгэхгүй байх байсан биз. Харин өнөөдөр бид энэ хүндтэй үүргийг хүлээж байна. Олон орон биднээс үлгэр жишээ авахыг хүсч байна...” гэв.
Хөрөнгө оруулагчдын сонирхол асар их нэмэгдэж буй энэ нөхцөлд хэрхэн хөрөнгө оруулагчдын сонирхлыг тэнцвэржүүлэх тухай оролцогчид сонирхож байсан. “Хэдий чинээ их хөрөнгө оруулалт орж ирнэ “бялуу” төдий чинээ том болно. Гэвч үндэсний эрх ашиг юу юунаас илүү чухал. Хүмүүс эрх чөлөөтэй байгаа цагтаа илүү хариуцлагатай байдаг билээ. Манай ард түмэн эрх чөлөөтэй учраас аливаа бүх асуудалд хариуцлагатай, ил тод, бүтээлч хандаж зөв шийдвэр гаргаж чадна гэдэгт би эргэлздэггүй” гэж Ерөнхийлөгч Ц.Элбэгдорж хариуллаа. Мөн мэдээллийн хурдтай, хүртээмжтэй байдал бидэнд зөв хамтрагчаа, зөв хөрөнгө оруулагчаа сонгоход туслах болно гэсэн юм.
Дэлхийд хосгүйд тооцогддог монголын түүх соёлын өв , уламжлал, зан заншлын талаар мөн ярилцсан. ЮНЕСКО-д бүртгэлтэй монголын түүх соёлын биет болон биет бус өвийн жагсаалт нэмэгдэж буйд талархаж байгаагаа Азийн нийгэмлэгийн гишүүд илэрхийллээ. Ерөнхийлөгч Ц.Элбэгдорж байгальд хамгийн ээлтэй амьдралын хэв маяг болох нүүдэлчин амьдрал бол хоцрогдол биш харин “өндөр технологи”–т хэв маяг гэсэн юм. Ялангуяа монгол гэрийн тухай түүний хэлсэн үг нүүдэлчин амьдралыг сурталчилж хамгаалдаг судлаачид, байгаль хамгаалагчдын сэтгэлд нийцэж байлаа. “Монгол гэр бол хүмүүжил, ёс суртахууны асар том өв юм. Тусгаарлах хана байхгүй учраас гэр бүл ямагт хамт байдаг. Хүүхдийнхээ дэргэд ээж аавууд ямагт сайн үлгэр дууриал үзүүлнэ, хүүхдүүд ээж аавынхаа сайн сайхнаас суралцана. Монголчуудын амьдралын хэв маяг ямагт нэг нэгнээ сайнаар хүмүүжүүлдэгт оршдог” гэж хэлэв.
Монгол Улсын Ерөнхийлөгчийн Авлигын эсрэг , шударга ёсыг тогтоохын төлөө, иргэний боловсролыг дээшлүүлэх, оролцоог хангах, байгаль хамгаалах бодлого, үйл ажиллагаанууд Азийн нийгэмлэгийн гишүүдийн анхаарлыг татаж байлаа.
Азийн нийгэмлэгийн төв байранд зохион байгуулсан энэхүү хүндэтгэлийн зоогт Ази судлаачид, улстөрчид, хөрөнгө оруулагчид болон Азид үйл ажиллагаа явуулдаг олон улсын байгууллагуудын төлөөлөгчид гээд 100 орчим зочид оролцов.
