Нэгдсэн Үндэстний Байгууллагын 66 дугаар чуулганд оролцож буй Монгол Улсын Ерөнхийлөгч Ц.Элбэгдорж есдүгээр сарын 21-нд Ардчилсан орнуудын хамтын нийгэмлэгийн хүрээнд Ардчиллын боловсролын асуудлаарх төр, засгийн тэргүүн нарын санаачилгын бүлгийг эхлүүлж байгаагаа мэдэгдлээ.
Ерөнхийлөгч Ц.Элбэгдоржийн эл санаачилгад Финландын Ерөнхийлөгч Таръя Халонен, Нигерийн Ерөнхийлөгч Жонатон Гүүдлак, Румыны Ерөнхийлөгч Траян Басешку, Люксембургийн Ерөнхий сайд Жан Клод Юнкер нэгдэн орлоо. Эдгээр Төр засгийн тэргүүнүүд ард түмнээ, ялангуяа залуу үеийг ардчиллын үнэ цэнэ, зарчимд сургах үүрэг, хэрэгцээ шаардлагыг нэмэгдүүлэхийг олон улсын хамтын нийгэмлэгт уриалав.
Түүнчлэн Санаачилгын бүлэг Ардчилсан орнуудын хамтын нийгэмлэгийн хүрээнд, НҮБ тухайлбал, ЮНЕСКО болон олон улсын бусад байгууллагатай үр дүнтэй хамтын ажиллагаа явуулахын төлөө байгаагаа тэмдэглэж, улс орнууд орон нутаг, үндэсний болон олон улсын хэмжээний үйл ажиллагаандаа ардчиллын боловсролд тэргүүлэх ач холбогдол өгч байх нь чухал хэмээн онцлов.
Энэхүү санаачилгыг Монгол Улс Ардчилсан орнуудын хамтын нийгэмлэгийг даргалахдаа тэргүүлэх ач холбогдол өгч буй ардчиллын боловсролыг урагшлуулах хүрээнд гаргаж байгаа юм.
Монгол Улс АОХН-ийг 2011-13 онд даргалж байгаа бөгөөд манай улсын тэргүүлэх чиглэлд ардчиллын боловсролоос гадна иргэний нийгмийн байгууллагын төлөвшлийг дэмжих, Азийн бүс нутгийн орнуудын хамтын ажиллагааг нэмэгдүүлэх, шинээр болон шилжилтийн үедээ яваа улс орнуудын ардчиллыг бэхжүүлэх үйлсэд дэм үзүүлэх, туршлага хуваалцах зэрэг арга хэмжээнд ач холбогдол өгч ажиллах юм.
