Ерөнхийлөгч Ц.Элбэгдорж өнөөдөр БНСУ-ын Ерөнхийлөгч Ли Мен Баг-тай уулзаж харилцаа, хамтын ажиллагааны асуудлаар тухтай ярилцлаа. Бидний харилцаа “Сайн хөршийн найрамдал, хамтын ажиллагааны Түншлэл”-ийн зарчмын дагуу бүх салбарт өргөжиж байгаа бөгөөд, Монгол Улсын хувьд БНСУ-тай хамтын ажиллагаагаа хөгжүүлэх нь манай гадаад бодлогын тэргүүлэх зорилтын нэг гэдгийг Ерөнхийлөгч Ц.Элбэгдорж хэллээ. Түүнчлэн, манай улс цаашид эдийн засгийн тогтвортой хөгжлийг хангах, байгалийн баялгаа зүй зохистой ашиглах зорилт тавин ажиллаж байгаа бөгөөд, энэ хүрээнд гадаадын түнш орнуудтайгаа, түүний дотор БНСУ-тай хамтран ажиллаж, туршлагаас нь суралцах, худалдаа хөрөнгө оруулалтыг нэмэгдүүлэх хүсэлтэй байгаа гэв.
Хоёр Ерөнхийлөгч, дипломат харилцаа тогтоосны 20 жилийн ойн босгон дээр хоёр талын хамтын ажиллагааг цаашид хэрхэн хөгжүүлэх талаар илэн далангуй санал бодлоо солилцсон юм.
Хоёр улсын харилцаа хамтын ажиллагаа Зүүн Хойд Азийн бүс нутгийн орнууд дундаас зөвхөн төр, Засгийн газрын түвшинд төдийгүй ард иргэдийн харилцаа ах дүүсэг, ойр дотно байдлаар илэрч байгааг Ерөнхийлөгчид олзуурхан тэмдэглэж байв.
Ерөнхийлөгч Ли Мен Баг дараа жил Монгол Улсад айлчлах бодолтой байгаагаа илэрхийлж, Ерөнхийлөгч Ц.Элбэгдоржийг тааламжтай цагтаа БНСУ-д айлчлахыг урилаа.
