Монгол Улсын Ерөнхийлөгч Ц.Элбэгдорж НҮБ-ын Ерөнхий Ассамблейн 66 дугаар чуулганд оролцож байх үеэрээ НҮБ-ын Хөгжлийн хөтөлбөрийн захирагч хатагтай Хелен Кларктай уулзлаа. Ерөнхийлөгч Ц.Элбэгдорж ярианыхаа эхэнд “Монгол Улс , НҮБ-ын хөгжлийн хөтөлбөрийн хамтын ажиллагаанд бид сэтгэл хангалуун байдаг. НҮБ-ын Хөгжлийн хөтөлбөрийн тусламжтайгаар манай улсад ядуурлыг бууруулах, эрүүл мэнд, боловсролыг сайжруулах, байгаль орчныг хамгаалах болон засаглалын чадавхийг бэхжүүлэх чиглэлд үр дүн олж байна. Хэрэгжүүлж буй төсөл хөтөлбөр, санхүүжилтийн хэмжээ нэмэгдэж буйд талархал илэрхийлье” гэв.
НҮБ-ын Хөгжлийн хөтөлбөрийн зүгээс үзүүлж буй дэмжлэг туслалцаа, ялангуяа хөдөө аж ахуй, байгаль орчны салбарт үр дүн өндөр байдаг. Манай оронд дараалан болсон зудны үеэр малчдад тусалж, малчдыг малжуулах зэрэг санаачилга амжилттай хэрэгжсэнд талархаж байгаагаа мөн Ерөнхийлөгч илэрхийлсэн. “Уур амьсгалын өөрчлөлтөөс болж манай малчид улам бүр бэрхшээл туулах боллоо. Монголд уур амьсгалын өөрчлөлт бодитой аюул дагуулж байгаа гэдгийг өнгөрсөн жил цөлд хийсэн Засгийн газрын хуралдаанаараа бид харуулахыг зорьсон” гэж тэрээр дурдлаа.
Эрүүл мэнд бол манай улс болон НҮБ-ын Хөгжлийн хөтөлбөрийн хамтын ажиллагааны бас нэгэн чухал салбар. НҮБ-ын Ерөнхий Ассамблейн 66 дугаар чуулганд оролцож байгаа “Итгэл” Хавдаргүй Монгол Үндэсний сангийн тэргүүн хатагтай Х.Болормаа, Эрүүл мэндийн сайд С.Ламбаа нар эмэгтэйчүүдийн хавдрыг бууруулах, вакцинжуулах, оношлогоог сайжруулах чиглэлээр хэд хэдэн амжилттай яриа хэлэлцээг хийсэн билээ. Хатагтай Хелен Кларк энэ чиглэлийн ажлууд эрчимжиж байгааг сайшаагаад, Шинэ Зеландын Ерөнхий сайд байхдаа бүх нийтийг оношлогоонд хамруулах ажилд онцгой анхаарч,хүн амаа гурван жил тутам үнэгүй бүх оношлогоонд хамруулдаг болсноор хавдрын төрлийн өвчлөлийг 20 хувиар бууруулж чадаж байсан тухай ярьсан юм.
Хатагтай Хелен Кларк НҮБ-ын Хөгжлийн хөтөлбөр үйл ажиллагаандаа бодлогын өөрчлөлт хийх гэж байгаа тухай мөн ярилаа.
Монгол Улс, НҮБ-ын Хөгжлийн хөтөлбөртэй хамтран “Олборлох үйлдвэрлэл ба хүний хөгжил “ сэдэвт олон улсын бага хурлыг ирэх 10 дугаар сард Улаанбаатар хотноо зохион байгуулах гэж байгаа. Энэхүү олон улсын хуралд хатагтай Хелен Кларк хүрэлцэн ирж оролцохоо дахин нотлов.
Уулзалтын үеэр хоёр талын хамтын ажиллагааны бусад асуудлаар ажил хэрэгч яриа өрнөлөө.
