Монгол Улсын Тэргүүн хатагтай Х.Болормаа НҮБ-ын Ерөнхий Ассамблейн 66 дугаар чуулганы хүрээнд болсон “Халдварт бус өвчнөөс урьдчилан сэргийлэх ба хянах” сэдэвт хуралдаанд оролцов. Тэрээр “Итгэл” Хавдаргүй Монгол Үндэсний сангийн санаачлагч, тэргүүний хувьд Монгол Улс дахь хавдартай тэмцэх үйл ажиллагааг идэвхжүүлэх, дэмжлэг үзүүлэх зорилготой хэд хэдэн уулзалт яриаг бусад орны мэргэжлийн хүмүүстэй хийлээ. Тухайлбал АНУ-ын Бүх нийтийг вакцинжуулах хөтөлбөрийн захирал хатагтай Лора Эфрос, тус байгууллагын Олон улсын харилцааны гүйцэтгэх захирал Жоан Бенсон нартай уулзаж монголд эмэгтэйчүүдийн хорт хавдрын эсрэг вакцинжуулалт хийх асуудлын талаар ярилцав.
Дэлхийн зуу гаруй улс 10-15 насны охидыг эмэгтэйчүүдийн хорт хавдрын эсрэг вакцинд бүрэн хамруулдаг бөгөөд тэдгээрийн 20 гаруй улсад вакцинжуулалтыг хуульчилсан байдаг юм байна. Эдгээр оронд вакцинжуулалт нь өвчлөлийг 40 хүртэл хувиар бууруулдаг гэж тогтоожээ. Манай улсад эмэгтэйчүүдийн хорт хавдар нь эмэгтэйчүүдийн өвчлөл дотроо хоёрдугаарт орж байна.
Мянганы Сорилын Сангийн санхүүжилтээр монголд вакцинжуулалт эхлэхэд бэлэн болоод байгаа ч энэ нь хамрагдах ёстой насны хүмүүсийн дөнгөж 10 хувьд хүрэлцэх юм. Үлдсэн 90 хувийг вакцинд үнэ төлбөргүй хамруулахын тулд санхүүжилт олох, вакцин авах зэрэг яриа хэлцээг “Итгэл” Хавдаргүй Монгол Үндэсний сангийн зүгээс хамтрагч талуудтай хийж эхлээд байна. Тухайлбал АНУ-ын вакцин үйлдвэрлэгч “Мерке” компанид хандаж эмэгтэйчүүдийн хорт хавдрын эсрэг вакциныг монголд хямдралтай үнээр нийлүүлэх саналыг тавиад байна.
Энэхүү уулзалтад “Итгэл“ Хавдаргүй Монгол Үндэсний сангийн тэргүүн, Монгол Улсын Тэргүүн хатагтай Х.Болормаа, Эрүүл мэндийн сайд С.Ламбаа , МСС-ийн Эрүүл мэндийн төслийн захирал А. Мөнхтайван, “Итгэл” Хавдаргүй Монгол Үндэсний сангийн гүйцэтгэх захирал Э.Эрдэнэ нар оролцлоо.
