Монгол Улсын Ерөнхийлөгч Цахиагийн Элбэгдорж НҮБ-ын Ерөнхий Ассамблейн 66 дугаар чуулганы дарга ноён Нассир Абдулазиз Нассертэй НҮБ-ын төв байранд уулзлаа. Ерөнхийлөгч Ц.Элбэгдорж, НҮБ-ын Ерөнхий Ассамблейн 66 дугаар чуулганыг амжилттай зохион байгуулсанд нь ноён Нассир Абдулазиз Нассерт талархал илэрхийлээд, дэлхийн хүн төрөлхтний амар амгалан, эрх тэгш амьдрах хүсэл эрмэлзэл НҮБ-ын хүчин чармайлтаар биеллээ олж байгааг сайшаалаа.
Хариуд нь Ноён Нассир Абдулазиз Нассер, Монгол Улс НҮБ-д гишүүнээр элссэн цагаасаа хойш идэвх санаачилгатай ажиллаж байгааг нь сайшаав. Тэрээр мөн Монгол Улс Ардчилсан орнуудын хамтын нийгэмлэгийг даргалж буйн хувиар энэ удаагийн чуулганд мэдэгдэхүйц амжилттай, идэвхтэй оролцож байна гээд хэд хэдэн салбар хуралдаан, албан бус уулзалтуудыг өөрсдийн санаачилгаар амжилттай зохион байгуулсанд баяр хүргэв.
Ерөнхийлөгч Ц.Элбэгдорж Ардчилсан орнуудын хамтын нийгэмлэгийг даргалах хугацаанд ардчиллын боловсролыг дэмжих, авилгыг үл тэвчих, иргэний нийгмийн байгууллагуудыг дэмжих, бүс нутгийн үйл ажиллагааг идэвхжүүлэх зэрэг чиглэлээр идэвхтэй ажиллахаар төлөвлөж байгаагаа дурьдав.
Манай Улс НҮБ-тай ирэх 5 жилд Ардчиллыг бэхжүүлэх, хүний эрхийг хангах, уур амьсгалын өөрчлөлтийн сөрөг нөлөөллийг бууруулах, засаглалыг нээлттэй ил тод болгох чиглэлд хамтын ажиллагаагаа үргэлжлүүлэх юм.
Мөн энэ өдөр Ерөнхийлөгч Ц.Элбэгдорж , Унгар Улсын Ерөнхийлөгч Шмитт Палтай уулзлаа Унгар Улсын талаас хамтын ажиллагаагаа хөдөө аж ахуй, үйлдвэрлэлийн салбарт эрчимжүүлэх, Улаанбаатар хотод Элчин сайдын яам, төлөөлөгчийн газар ажиллуулах, мөн визний асуудлыг хөнгөвчлөх санал тавилаа. “Унгарчууд бид угсаа гарлаа мартдаггүй ард түмэн. Бидэнд хэдэн зуун жилийн улбаатай түүхэн харилцаа байдаг. Социализмын үед Унгарт олон монгол иргэд мэргэжил эзэмшиж байсан. Энэ харилцааг сэргээх боломж бий гэж үзэж байна” гэж Ерөнхийлөгч Шмитт Пал ярилаа. Ерөнхийлөгч Ц.Элбэгдорж тавьсан саналууд ажил хэрэг болох боломжтойг дурьдаад, Унгар Улсын Ерөнхийлөгчийг эх орондоо урив. Ноён Шмитт Пал Монгол Улсад хөдөө аж ахуй, хөнгөн үйлдвэр, уул уурхайн салбарт хөрөнгө оруулах сонирхол нэмэгдэж байгааг дурьдаад, монголд очихдоо ажил хэрэгч бизнесийн хүмүүсээ дагуулан ирэх болно гэлээ.
