Монгол Улсын Ерөнхийлөгчийн Тамгын газрын дарга, Нийслэлийн агаарын бохирдлыг бууруулах Үндэсний хорооны дарга Д.Баттулга Сонгинохайрхан, Баянзүрх дүүргийн хороодын айл өрхүүдэд утаагүй зуух олгох ажил хэр байгаатай танилцахаар дүүргүүдийн удирдлага, хороодын дарга, хэсгийн ахлагч нартай өчигдөр уулзлаа. Уулзалтад БОАЖ-ын яамны Төрийн нарийн бичгийн дарга Н.Батсуурь, нийслэлийн Засаг даргын орлогч Д.Ганболд, дүүргийн Засаг дарга Ц.Болд, Мянганы сорилын сан /МСС/, Хас банкны холбогдох хүмүүс оролцов.
Сонгинохайрхан дүүрэгт зуух олгох ажил нээлтээ хийгээд 10 хонож байхад эхлээгүй байв. Хэсгийн ахлагчдын ярьснаар Хас банк, МСС-гийн ажлын зохицуулалт муу байгаагаас зуух олголт саатаж буй ажээ. Түүнээс гадна нэг зуух суурилуулахад 30 минут зарцуулахаар тооцсон, хороодод барьсан гэрт ганцхан хүн гэрээ хийхээр ажилладаг, Хас банкны үйл ажиллагаа удаан, дулаалга нийлүүлэх 12 компанийн зөвхөн нэгийнх нь танилцуулга, нэхэмжлэлийн хуудас байгаа зэрэг нь иргэдийг бухимдалд хүргэжээ. Энэ байдлаар бол өдөрт 16 –хан айлд зуух суурилуулах юм байна. Тэгэхдээ гэрээ хийж, зуухаа сонгон банкинд мөнгөө тушааснаас хойш 14 хоногт багтаан зуухтай болохоор байгаа бололтой. Уулзалтад оролцсон МСС-гийн менежер Б.Батбаатар “Зуух суурилуулах ажлыг маргаашнаас эхэлнэ. Хуваарийн дагуу ирэх оны хоёрдугаар сарын 28 хүртэл олгох болно” гэв. Хас банкны төлөөлөгчийн хэлснээр төлбөрийг дүүргийнхээ 5, нийслэлийн 33 салбараар үйлчлүүлж болно гэж байлаа.
Нийслэлийн агаарын бохирдлыг бууруулах Үндэсний хорооны дарга Д.Баттулга хэлэхдээ “Хэсгийн ахлагч нар юутай ч гэрээг нь хийлгээд мөнгийг нь тушаалгаад хүлээлгэж бай. Бид суурилуулах ажлыг нь яаравчлах талаар зохицуулалт хийе. Болбол энэ ондоо багтаагаад айлууддаа олгохыг хичээе. Ирэх оны хоёрдугаар сарын 28 хүртэл гэж болохгүй. Бараг өвөл дуусах гэж байхад олгоно гэдэг зохимжгүй. МСС, Хас банкны удирдлагуудтай уулзъя. Хэсгийн ахлагч нарт зуухыг ашиглах талаар сургалт явуулах хэрэгтэй байна. Нэг айлд 30 минут болно гэдэг дэндүү их удаан хугацаа. Оруулж өгөөд л хэсгийн ахлагч нар яаж асаах, ашиглахыг нь заагаад байж болно шүү дээ. Та нар хэсгийн ахлагч төдийгүй агаарын чанарын байцаагч болсон гэсэн үг. Хэсгийн ахлагч нарын урамшууллын мөнгийг сар бүр өгнө. Дүүргүүд рүү шилжүүлсэн байгаа. Гэрүүдэд ажиллах хүний тоог нэмэх хэрэгтэй. Дүүргийн Засаг дарга үүнд зохицуулалт хийж ажиллах хэрэгтэй“ хэмээн хэлэв.
Дараа нь Баянзүрх дүүрэгт очиход Засаг дарга Б.Батзориг хэсгийн ахлагч нартайгаа хүлээж байв. Тэнд байдал арай дээр байлаа. 607 зуух хэдийнэ айлдаа очжээ. Гэхдээ дээрхтэй адил бэрхшээл тоочиж, мөнгөө төлчихөөд олон хоног хүлээж байна хэмээн шүүмжиллээ. Үүний учрыг суурилуулагч “Сэлэнгэ костракшн” компанийн менежер Л.Мягмаржав тайлбарлахдаа “Анх МСС, Хас банктай хийсэн тохиролцоо, түүний дагуу суулгасан компьютерийн програмтай холбоотой. Тэрнээс бид олон машин, хүн гаргаад хүргэхэд бэрхшээл байхгүй. Одоо тэр програмын дагуу маргааш ийм ийм айлд хүргэж болно гэмэгц суурилуулж байгаа” гэлээ. Иймээс Нийслэлийн агаарын бохирдлыг бууруулах Үндэсний хорооны дарга Д.Баттулга хэсгийн ахлагчдад гэрээгээ хийгээд, төлбөрөө төлчих, бусдыг нь холбогдох байгууллагуудтай ярьж зохицуулъя” гээд МСС-гийн төлөөлөгчөөс зуухаа яаж ашиглах талаар сурталчилгааны ажлыг яаравчлахыг шаардлаа.
