Монгол Улсын Ерөнхийлөгч Ц.Элбэгдорж Дархан-Уул аймгийн шүүхтэй аравдугаар сарын 1-нд танилцлаа. Үйл ажиллагаагаа тус шүүхийн ерөнхий шүүгч Л.Амарсанаа, ахлах зуучлагч Д.Пүрэвдорж нар танилцуулсан юм.
Тус шүүх үүдний өрөөндөө цахим самбар байрлуулж тухайн өдрийн хуралдаан хэдэн цагт болох, ямар асуудал хэлэлцэх, хуралдаанаар ямар шийдвэр гаргасан, эсвэл хойшлогдсон гэхчлэн иргэдэд шаардлагатай бүх мэдээллийг дэлгэцээр үзүүлдэг юм байна. Түүнчлэн шүүх хурлыг телевизийн дэлгэцээр харах, хүүхдийн хэргийг хэрхэн шийдэж, тэдэнд ямар байдлаар хандаж буйг эцэг эх нь ажиглах өрөөтэй болжээ. Эдний дээр Улсын Дээд Шүүх ЖАЙКА байгууллагатай хамтран Эвлэрүүлэн зуучлах тогтолцоог сайжруулах төсөл хэрэгжүүлж байгаа аж. Эвлэрүүлэн зуучлах өрөөгөө үзүүлэхэд Ерөнхийлөгч “Бид Эвлэрүүлэн зуучлах хуулийн төслийг УИХ-д өргөн барьсан байгаа. Энэ нь гэр бүлийн, хөдөлмөрийн болон өр зээлийн зэрэг ялимгүй хэрэг маргааныг олон сараар сунжруулж чирэгдэл учруулалгүй, заавал нэгийг нь яллаж шийтгэлгүйгээр ойлголцуулан зуучилж, хуулийн хүрээнд хялбаршуулсан журмаар өдөрт нь зохицуулах, шийдэх хэлбэр юм. Эдний дээр иймэрхүү хэд хэдэн төсөл хэрэгжиж байгааг бид харж байна. Дархан-Уул аймгийн шүүх дээр янз бүрийн асуудлаар чих халууцуулсан юм сонсогддог. Та нар энэ дутагдал, хүнд суртлаа засах хэрэгтэй . Шүүгчид ёс зүйтэй, хариуцлагатай байх ёстой. Яагаад гэвэл шүүх үйл ажиллагаа чинь ил тод боллоо. Өмнө нь ороход ч хэцүү байсан бол одоо хаалгаар алхмагц иргэдэд үйлчилдэг байгууллага болж байна” гэв. Ерөнхийлөгч тус шүүхийн ачаалал, хэдэн шүүгчтэй, хүмүүсийн хандлага ямар байгааг сонирхоход “Их байгаа. Өнгөрсөн жил гэхэд нэг шүүгч дээр 388 хэрэг байсан. Манайх эрүү, иргэн, захиргааны гээд төрөлжсөн 16 шүүгчтэй. Сүүлийн үед хүмүүсийн ам сайн байгаа. Өнгөрсөн жил манай сум дундын шүүх улсын хэмжээнд шилдэг менежменттэй шүүхээр шалгарсан ” гэж хариулж байлаа.
Ерөнхийлөгч шүүгчдийн ачааллыг бууруулах зорилгоор шүүхийг тойргийн журмаар байгуулахаар хуулийн төсөлд тусгасныг дурьдаад нөгөөтэйгүүр засаг захиргаагаа дагахаараа удирдлагаа харсан шүүх болчихоод буйг хэлэв. Мөн шүүгч тасалж чадахгүй бол иргэдийн төлөөлөгч таслах эрхтэй шүүх хуралд оролцдог болохоор хуулийн төсөлд туссаныг, ингэснээрээ иргэний оролцоотой шүүх болж буйг анхаарууллаа. Шүүгчдийн бие даасан, хараат бус байдал нэмэгдэнэ. Шүүхийн санхүүжилтийн асуудал Сангийн яамаар бус Засгийн газраар дамжаад санал болгосон хэр хэмжээгээрээ УИХ-д ордог болно. Шүүгч нарын хариуцлага, мэдлэг өндөр байхыг шаардсан тийм хуулийн төслүүд өргөн баригдсан гэдгийг Ерөнхийлөгч бас хэлэв.
Тус шүүхийн шүүгч нар хэргийн оролцогчтой ганцаараа уулзахыг больсон юм байна. Туслахтайгаа хамт уулздаг, гэхдээ ажлаа хийх үедээ тусдаа өрөөнд суудаг болсон ажээ. Ерөнхийлөгч үүнийг зөв, цаашдаа бүгд ийм болно гээд ганцаараа уулздагаас янз бүрийн хардалтад ордог, бусад үед ажлаа хийх гэхээр хажууд нь хүн суугаад байдаг зэрэг асуудал байхгүй болно хэмээлээ.
