ХБНГУ-ын Берлин хотноо зохиогдож буй “Берлин - 2011” Европ дахь монголчуудын анхдугаар чуулга уулзалтад оролцогчдод
Эрхэм хүндэт оюутан, залуусаа,
Ирээдүйн эзэд хүндэт дүү нараа,
Эрдэм өвөрлөн ирэхээр алс холыг зорин, дэлхийн нэр хүндтэй их дээд сургуулиудад суралцаж яваа оюутнууд, эзэмшсэн мэргэжлийнхээ ур чадвараар Монгол түмнийхээ нэр төрийг өндөрт өргөж яваа эрхэм залуус Та бүхнийхээ амгаланг айлтгая.
Өнөөдөр Европ тивд мянга, мянган Монголчууд маань сурч хөдөлмөрлөж, ажиллаж амьдарч байна. Тэд маань суугаа улсынхаа амьдралын хэвшил, соёл, зан заншилыг судлан мэдэхийн зэрэгцээ эх орныхоо өв соёл, эрхэм уламжлалыг дэлхийд сурталчлах хүндтэй үйлсэд зүтгэж ирсэн билээ. Тив алгасан холыг зорьсон ч та бүхэн эх орноо хайрлах, өв уламжлалаа хүндэтгэх үзлээр бадарч, улс орноо хөгжүүлэх гал халуун эрмэлзлэл, итгэл үнэмшил, цогц санаачилгыг өөртөө бий болгодог. Ингэж дэлхийн шилдэг туршлагуудыг өөриймсүүлж чадсан залуус маань эх орныхоо хөгжилд тулгамдаад буй олон асуудлыг шинэ өнцгөөс харсан олон ургалч үзлийн давалгааг үүсгэж, улмаар үндэсний оюуны баялгийг өсгөн нэмэгдүүлдэг гэдэгт би итгэдэг.
Монгол Улсын хамгийн үнэ цэнэтэй баялаг бол монгол хүний оюуны чадамж, эх орноо гэсэн зүрх сэтгэл, сайн сайхан хөгжил өөд тэмүүлсэн итгэл үнэмшил, хойч үедээ шударга ардчилсан нийгмийг өвлүүлэн үлдээх гэсэн бидний эрхэм хүсэл, энэ бүгдийг багтаасан үнэт зүйл гэдэгт би хэзээ ч эргэлздэггүй.
Миний бие Монгол Улсын Ерөнхийлөгчийн хувьд хилийн чанадад суралцагч, төгсөгч залуучууддаа чиглэсэн төрийн уламжлалт бодлогыг улам боловсронгуй болгож, шинэ шинэ шийдлүүдийг хэрэгжүүлэхийг зорьж байна. Тухайлбал, гадаадад өндөр боловсрол эзэмшээд эх орондоо эргэн ирж буй залууст төрөл бүрийн бодит дэмжлэг үзүүлэх алхмуудыг агуулсан Дээд боловсролын санхүүжилтийн хууль, “Зөгийн үүр” хөтөлбөр, мөн түүнчлэн гадаадад байгаа иргэдийн сонгуулийн эрхийг хангах гэх зэрэг санаачлагуудыг энд дурдах нь зүйтэй гэж үзэж байна.
“Берлин - 2011” чуулга уулзалтад оролцож байгаа залуус аа,
Та бүхний итгэл найдвар, хичээл зүтгэл, эрдэм мэдлэгээс эх орны минь маргааш цогцлон бүтэх учиртай. Таны мэдлэг боловсрол, эзэмшсэн мэргэжил, өндөр ур чадвар тань Монгол Улсын хөгжилд үнэтэй хувь нэмэр оруулна гэдэгт би итгэл дүүрэн байна.
Чуулганы ажилд өндөр амжилт хүсээд, оролцогч залуус та бүхний аж амьдралд аз жаргал, сайн сайхныг хүсэн ерөөе.
МОНГОЛ УЛСЫН ЦАХИАГИЙН
ЕРӨНХИЙЛӨГЧ ЭЛБЭГДОРЖ
2010 оны 9 дүгээр сарын 30
