Монгол Улс, Азийн хөгжлийн банкны хамтын ажиллагааны 20 жилийн ой энэ өдрүүдэд тохиож байгаа бөгөөд түүнийг тохиолдуулан Монгол Улсын Ерөнхийлөгчийн санаачилгаар зохион байгуулж байгаа “Монгол Улс ба Азийн хөгжлийн банкны түншлэл: Эрүүл, аз жаргалтай, эв найрамдалтай Монголыг бий болгох арга зам” сэдэвт өндөр хэмжээний чуулган өнөөдөр эхэллээ.
Өндөр хэмжээний чуулганыг нээж Монгол Улсын Ерөнхийлөгч Ц.ЭЛБЭГДОРЖ үг хэллээ.
Тэрээр “Монголчууд өнгөрсөн 20 жилд олсон ололт амжилтаараа бахархдаг. Энэ 20 жилийн амжилт бол бидний олон түнш, хамтрагч, дэмжигчидтэй хамтарч олсон ололт юм. Тэр дундаа Азийн хөгжлийн банк нь, Монгол Улсыг нийгмийн нэг тогтолцооноос нөгөө тогтолцоо руу шилжих үйл явцад нийгмийн бүхий л салбарт найдвартай түнш, дэмжигч байж ирлээ.
Өнөөдөр Та бид хамтын ажиллагааны 20 жилээ дүгнэж, цаашдын 20 жилээ төлөвлөн ярилцаж байна. Монгол орон далайд гарцгүй, хөгжил дорой, түгжигдмэл орноос, өндөр хөгжилтэй, иргэн бүр нь орлоготой хангалуун амьдардаг орон гэж хэлэгдэх тэр цаг ойрхон байна.
Монгол шиг нээлттэй нийгмийн тогтолцоотой, хүн ам цөөн улсад аливаа санаачилга үр дүнтэй хэрэгжиж, бусдад үлгэр жишээ болох нь амархан. Тийм учраас бидний хамтын санаачилга үр дүнтэй, бодитой хэрэгжих боломжтой юм.
Өнөөдөр Монгол Улс эдийн засгийн хурдацтай хөгжлийн гараан дээр байна. Бидний өмнө шинэ боломж байна. Хамтын ажиллагааны өнгөрсөн 20 жилд бид зөвхөн хямрал, хүндрэлийг давах тухай ярьдаг байсан бол дараагийн 20 жил сорил, боломжийн тухай ярих цаг юм. Өмнөө тулгарч байгаа шинэ сорилуудыг хэрхэн боломж болгож ашиглах вэ гэдэг талаар бид бодох болжээ. Хэрвээ муу засаглалтай, хууль хэрэгждэггүй, шударга бус шүүхтэй бол их мөнгө байгаад ч энэ нь боломж биш юм.
Дараагийн бидний сорил бол хүмүүстээ эрх мэдэл өгөх явдал юм. Эрх мэдэлтэй иргэн л баялгийг бүтээлчээр зарцуулж, жинхэнэ баялаг бий болгож чадна. Бүтээлч иргэн л хөгжилд хөтөлж чадна. Тэгэхээр иргэдээ эрх мэдэлтэй, бүтээлч болгож, бүтээлч иргэдээрээ дамжин хөгжих боломж бидэнд бий. Ингэхийн тулд бидний хийх ёстой нэг зүйл бол төлөөллийн ардчиллаас шууд ардчиллын зарчим руу шилжих нь зөв гэж бодож байна.
Эдийн засгийн өсөлтийн үр шимийг иргэн бүр хүртэж, орлогын хуваарилалт жигд байх ёстой, далайд гарцгүй орон хэдий ч бүс нутгийн дэд бүтцэд холбогдох гэх мэт бусад сорилууд ч бидний өмнө байна... Сорил бүхнийг боломж болгох дараагийн 20 жилийн хамтын ажиллагаанд амжилт хүсье” гэлээ.
Энэхүү өндөр хэмжээний чуулганд Азийн хөгжлийн банкны Ерөнхийлөгч Харухико Курода мөн оролцож байна. Тэрээр “Эдийн засгийн өсөлт өөрөө сайн зүйл хэдий ч ашиг тусыг нь нийгмийн бүх давхарга хүртэх тал дээр илүү хүчин чармайлт гаргах шаардлагатай. Энэ нь эдийн засгийн өндөр өсөлтийн үр өгөөжийг илүү өргөн хүрээнд хуваарилж, хүмүүст тэнцүү боломж нээж, нийгмийн суурь үйлчилгээнээс тэнцвэртэй хүртэнэ гэсэн үг “ гэж хэллээ.
