Монгол Улсын Ерөнхийлөгч Ц.Элбэгдорж Азийн хөгжлийн банкны ерөнхийлөгч Харукихо Куродаг өнөөдөр хүлээн авч уулзлаа. Ноён Х.Курода нь Монгол Улс, Азийн хөгжлийн банкны хамтын ажиллагааны 20 жилийн ойг тохиолдуулан Улаанбаатар хотноо болж буй түншлэлийн чуулга уулзалтад оролцож байгаа юм.
Уулзалтын эхэнд хамтын ажиллагааны өнгөрсөн 20 жилийн үр дүнд сэтгэл хангалуун байгаагаа харилцан илэрхийллээ.
Монгол Улсад хүнд хэцүү цагт үргэлж тусалж дэмжиж, нийгмийн салбар бүрт үр дүнтэй төсөл хөтөлбөр хэрэгжүүлж ирсэнд талархал илэрхийлээд “Бидний хамтын ажиллагааны шинэ үе эхэлж байна. Уул уурхайн баялгийг эдийн засгийн эргэлтэд оруулж байна. Эрчимтэй хөгжлийн босгон дээр байгаа энэ үед зөв бодлого, үр ашигтай хамтын ажиллагаа юу юунаас илүү чухал. Тухайлбал манай улс импортын нефтийн бүтээгдэхүүнээс 100 хувь хараат бөгөөд энэ байдлаас гарах зорилготой томоохон хэмжээний төслийг эхлүүлэх төлөвтэй байгаа. Энэ мэт асуудлыг АХБ дэмжин хамтран ажиллана гэдэгт итгэлтэй байна...” хэмээн Ерөнхийлөгч Ц.Элбэгдорж хэлэв.
Ноён Х.Курода ирэх жилүүдэд АХБ-аас үзүүлэх тусламж дэмжлэг нь тээвэр, эрчим хүч, усан хангамж болон дэд бүтцийн бусад салбар, мөн боловсрол, эрүүл мэнд зэрэг төрийн суурь үйлчилгээнүүдэд чиглэх болно хэмээн тэмдэглэлээ.
АХБ нь 1991 оноос хойш Монгол Улсад 794 сая долларын 45 зээл олгож, 172 сая долларын 12 төсөл хэрэгжүүлэн, 86 сая долларын техникийн туслалцаа, ядуурлыг бууруулах сангийн 31 сая долларын буцалтгүй тусламж үзүүлээд байна.
Бүх хүнд хэцүү цагт болон эдийн засгийн сэргэлтийн үед АХБ ямагт хамт байж, Монгол Улсад нийт 1 тэрбум орчим долларын бодит хөрөнгө оруулсан нь 1991 оноос хойш Монгол Улсад үзүүлсэн нийт зээл тусламжийн дөрөвний нэгтэй тэнцэж байна. Энэ нь АХБ-ыг манай орны хамтын том хамтрагч олон улсын байгууллага болохыг илтгэж байгаа юм.
