Монгол Улсын Ерөнхийлөгч Ц.Элбэгдоржид Япон Улсаас тус улсад суух Онц бөгөөд Бүрэн эрхт Элчин сайд Шимизү Такэнори өнөөдөр итгэмжлэх жуух бичгээ өргөн барив. Итгэмжлэх жуух бичгээ өргөн барьсантай нь холбогдуулан Ерөнхийлөгч Элчин сайдыг хүлээн авч уулзлаа.
Элчин сайд Шимизү Такэнори хэлэхдээ “Япон Улсын Цог Жавхлант Эзэн хаан Эрхэм Ерөнхийлөгч танд өөрийн мэндийг дамжуулахыг хүсэх ялдамд надаар үг дайлгаж, хоёр орны харилцаа эрчимтэй хөгжиж байгаад сэтгэл хангалуун байгаагаа илэрхийлсэн. Хоёр орны харилцаа, хамтын ажиллагааг шинэ шатанд гаргахад ялангуяа өнгөрсөн онд таны хийсэн айлчлал чухал үүрэг гүйцэтгэснийг тэмдэглэхэд таатай байна. Стратегийн хамтын ажиллагааг хөгжүүлэхэд таны дэмжлэгийг хүсч байна” гэв.
Монгол Улсын талаар өргөн мэдлэгтэй, туршлагатай дипломатч Япон улсаас Элчин сайдаар томилогдон ирж байгаад баяртай байна. Япон, Монголын харилцаа, хамтын ажиллагаанд сэтгэл хангалуун байгаа Эзэн хааныхаа үгийг дамжуулсанд баярлалаа. Өнгөрсөн жил Японд айлчлахад Эзэн хаан маш их анхаарал тавьж хүлээн авсанд талархдаг. Монгол, Японы харилцаа, хамтын ажиллагааг эрчимжүүлэхэд эдийн засгийн харилцан үр ашигтай хамтарч ажиллагаа нэн чухал юм. Стратегийн хамтын хамтын ажиллагааг уул уурхай, эрдэс баялаг, эрчим хүч, дэд бүтэц, мал аж ахуй, газар тариалан салбарт хөгжүүлэхээр хамтарсан мэдэгдэлд тусгасан. Энэхүү стратегийн түншлэлийг хөгжүүлэхэд юуны өмнө Эдийн засгийн түншлэлийн хэлэлцээрийг яаралтай эхлүүлэх хэрэгтэй байна. Мөн ирэх жил Монгол, Японы хооронд дипломат харилцаа тогтоосны 40 жилийн ой болно. Энэ ойн хүрээнд Японы Цог Жавхлант Эзэн хааныг Монгол оронд морилон ирэхийг хүсч байна. Үүнийг дамжуулж өгөхийг Элчин сайдаас хүсье гэж Ерөнхийлөгч хэллээ.
