Монгол Улсын Ерөнхийлөгч Ц.Элбэгдоржид БНАЛАУ-аас тус улсад суух Онц бөгөөд Бүрэн эрхт Элчин сайд Бүнньян Сайсанавонг өнөөдөр итгэмжлэх жуух бичгээ өргөн барилаа. Итгэмжлэх жуух бичгээ өргөн барьсантай нь холбогдуулан Ерөнхийлөгч Элчин сайдыг хүлээн авч уулзав.
Монгол Улсын гадаад бодлогод Ази, Номхон далайн бүс нутаг, тэр дундаа Зүүн өмнөд Ази буюу АСЕАН-ы орнуудтай харилцаа, хамтын ажиллагаагаа гүнзгийрүүлэх асуудал чухал байр суурь эзэлдэг. Энэ хүрээнд БНАЛАУ-тай уламжлалт найрсаг харилцаа, хамтын ажиллагаагаа идэвхжүүлэхийн төлөө байгаа. Та чухал ойн өмнө итгэмжлэх жуух бичгээ өргөн барьж, ажилдаа орж байна. 2012 онд хоёр орны хооронд дипломат харилцаа тогтоосны 50 жилийн ой болно. Мөн өнгөрсөн онд болсон Монгол, Лаосын Засгийн газар хоорондын комиссын наймдугаар хуралдааны шийдвэрүүдийг хэрэгжүүлэхийн төлөө ажиллана гэдэгт итгэж байна хэмээн Ерөнхийлөгч хэллээ.
Элчин сайд Бүнньян Сайсанавонг 2012 онд Лаост болох АСЕМ-ийн дээд хэмжээний уулзалтад Монгол Улсын Ерөнхийлөгчийг оролцохыг уриад Засгийн газар хоорондын комиссын шийдвэрийг хэрэгжүүлэхэд анхаарч ажиллахаа илэрхийлэв.
