Монгол Улсын Ерөнхийлөгчийн Тамгын газар, Монголбанк, Үндэсний хөгжил шинэтгэлийн хорооноос хамтран Ерөнхийлөгчийн дэргэдэх “Төлбөрийн тэнцэл, валютын бодлогын дэд зөвлөл”-ийн ээлжит хуралдаан, нээлттэй хэлэлцүүлгийг 2011 оны 10 дугаар сарын 12-нд МУИС-ийн лекцийн дугуй танхимд зохион байгууллаа.
Энэ өдрийн хэлэлцүүлгийг УИХ-ын даргын эдийн засгийн бодлогын зөвлөх Д.Даваасамбуу хөтлөн явуулсан юм.
Монголбанк, Үндэсний хөгжил шинэтгэлийн хорооноос нийт 3 илтгэл хэлэлцүүлсэн ба Монголбанкнаас ханшийн бодлогын талаар баримталж буй үндсэн зарчим, түүний хэрэгжилт, валютын дотоодын захын тогтвортой байдалд нөлөөлж буй хүчин зүйлс, төгрөгийн гадаад валюттай харьцах ханшийн чангаралтын бодит эдийн засаг болон импортын өсөлтөд нөлөөлөх байдалд хийсэн дүн шинжилгээ, гадаад секторын статистик, төлбөрийн тэнцлийн гүйцэтгэл ба хандлага зэрэг өргөн хүрээтэй асуудлаар тавьсан сонирхолтой илтгэлүүдийн дараа олон нийтийн санал бодлыг сонсох нээлттэй хэлэлцүүлэг өрнүүллээ.
Уг хуралдаан нь гадаад секторын өнөөгийн байдал, цаашдын хандлагын талаар олон нийтэд бодитой мэдээлэл өгөх, валютын бодлогын үндсэн зарчим, хэрэгжилтийг тайлбарлан таниулах, хөрөнгийн урсгалын эдийн засагт нөлөөлөх сувгууд, болзошгүй нөлөөллийг үнэлэхэд чиглэсэн билээ.
Хэлэлцсэн сэдэв:
1. “Монгол Улсын төлбөрийн тэнцлийн 2010 оны гүйцэтгэл, 2011 оны хүлээгдэж буй үр дүн, дунд хугацааны хандлага” Монголбанкны ахлах эдийн засагч Ц.Мөнхбаяр
2. “Валютын захын өнөөгийн байдал, ханшны бодлогын зарим асуудал” Монголбанкны ВЭЗГ-ын ТТССХ-ийн захирал С.Болд
3. “Төгрөгийн ханшны чангаралт эдийн засгийн бодит салбаруудад нөлөөлөх нөлөөлөл” Үндэсний хөгжил шинэтгэлийн хорооны Хөгжлийн бодлого, стратеги төлөвлөлтийн газрын мэргэжилтэн Т.Дэлгэрнаран
Дараагийн өдрүүдийн хуралдааны хуваарь:
1. МОНГОЛ УЛСЫН ЕРӨНХИЙЛӨГЧИЙН ДЭРГЭДЭХ МӨНГӨНИЙ БОДЛОГЫН ДЭД ЗӨВЛӨЛИЙН ХУРАЛ
Хаана: Улаанбаатар хот, МУИС-ын дугуй танхим
Хэзээ: 2011 оны 10 дугаар сарын 13-ны Пүрэв гаригийн 09.30 цагт
Хуралдааныг даргалах: Р.Амаржаргал – Улсын Их хурлын гишүүн
2. МОНГОЛ УЛСЫН ЕРӨНХИЙЛӨГЧИЙН ДЭРГЭДЭХ ТӨСВИЙН БОДЛОГЫН ДЭД ЗӨВЛӨЛИЙН ХУРАЛ
Хаана: Улаанбаатар хот, МУИС-ын дугуй танхим
Хэзээ: 2011 оны 10 дугаар сарын 14-ний Баасан гаригийн 11.00 цагт
Хуралдааныг даргалах: Ч.Улаан – Улсын Их хурлын гишүүн
3. МОНГОЛ УЛСЫН ЕРӨНХИЙЛӨГЧИЙН ДЭРГЭДЭХ ЭДИЙН ЗАСГИЙН ӨСӨЛТ, БОДИТ СЕКТОРЫН БОДЛОГЫН ДЭД ЗӨВЛӨЛИЙН ХУРАЛ
Хаана: Улаанбаатар хот, МУИС-ын дугуй танхим
Хэзээ: 2011 оны 10 дугаар сарын 17-ны Даваа гаригийын 09.30 цагт
Хуралдааныг даргалах: Ц.Даваадорж - Монгол Улсын их сургуулийн Эдийн засгийн сургуулийн захирал
