Монгол Улсын Ерөнхийлөгч Ц.Элбэгдорж, ХБНГУ-ын Канцлер А.Меркель нар монгол, германы энхийг сахиулагчид, офицер ахлагч нартай өнөөдөр уулзлаа. Монгол Улсын энхийг сахиулагчид Афганистанд ХБНГУ-ын энхийг сахиулагчидтай хамтран үүрэг гүйцэтгэж байна. Өнөөдөр Ерөнхийлөгч, Канцлертэй уулзсан Монгол Улсын 10, ХБНГУ-ын 5 офицер, ахлагч бол дараагийн ээлжинд явахаар бэлтгэгдэж байгаа 160 энхийг сахиулагчийн төлөөлөл юм.
Монголын энхийг сахиулагчид Канцлер А.Меркельтэй герман хэлээр мэндэлж байлаа. Тэдний зарим нь Германд бэлтгэгдсэн, мөн одоо герман хэл судалж буй юм байна.
ХБНГУ-ын Канцлер А.Меркель офицер ахлагч нарт хандан “Монгол Улсын зэвсэгт хүчний төлөөлөл болсон Та бүхэнд талархаж байгаагаа илэрхийлье. Манай Холбооны Герман Улсын цэргүүд та бүхэнтэй мөр зэрэгцэн үүрэг гүйцэтгэж байгаад би баяртай байна. Энхийг сахиулна гэдэг “хүүхдийн тоглоом” биш. Энэ бол нэр хүндтэй сайхан үүрэг юм. Та бүхэн үүргээ амжилттай биелүүлнэ гэдэгт итгэж байна” гэлээ.
Монгол Улсын Ерөнхийлөгч Ц.Элбэгдорж монголын энхийг сахиулагчдад тусалж дэмжин, сургаж байгаа германы сургагч багш нарт талархаж байгаагаа илэрхийлж, манай хоёр орны цэрэг, батлан хамгаалах салбарын хамтын ажиллагаа чухал болохыг дурьдлаа. Тэрээр офицер , ахлагч нарт хандан Афганистанд үүргээ нэр төртэй биелүүлэхийг хүсэв.
