Монгол Улсын Ерөнхийлөгчийн Тамгын газар Нээлттэй нийгэм форумтай хамтран “Хүний нэр төр, алдар хүндийн эрх зүйн хамгаалалт” сэдвээр “Иргэний танхим”-д хэлэлцүүлэг зохион байгуулж, хууль, шүүх, өмгөөллийн болон хэвлэл мэдээлэл, төрийн бус байгууллагуудын төлөөлөл, хууль зүйн сургуулийн багш, судлаачид оролцлоо. Хэлэлцүүлгийг Монгол Улсын Ерөнхийлөгчийн санаачилгаар “Хэвлэлийн эрх чөлөөний тухай” хуулийн төслийг шинэчлэн найруулж байгаатай холбогдуулан хийж байгаа юм. Ийнхүү Эрүүгийн хуулийн нэр хүнд гүтгэх, гутаан доромжлохтой холбоотой 110, 111 дүгээр зүйлийг хүчингүй болгох нэмэлт өөрчлөлтөд оролцогчдын саналыг сонслоо. Хэлэлцүүлгийн үеэр Нийслэлийн захиргааны хэргийн давж заалдах шатны шүүгч М.Батсуурь “Гүтгэх, доромжлох гэмт хэрэг мөн үү”, Батлан хамгаалах яамны Төрийн нарийн бичгийн даргын үүрэг гүйцэтгэгч Ш.Сүхбаатар саяхан хуул зүйн ухааны докторын зэрэг хамгаалсан сэдвээрээ буюу “Хүний нэр төр, алдар хүндийн эрх зүйн хамгаалалт”, “Өдрийн сонин”-ы сэтгүүлч Э.Энэрэл “Нэр хүнд гутаан доромжлох гэмт хэргийн талаарх сэтгүүлчийн байр суурь” гэсэн илтгэлүүд тавьж, өөрсдийн байр суурийг илэрхийлэв.
Оролцогсдын дийлэнх хэсэг Эрүүгийн хуулийн 110,111 дүгээр зүйлийг хасч, иргэний хуульд эл асуудлыг илүү тодорхой зүйлчлэн тусгаж шийдэж байх нь зүйтэй гэж үзэж байв. Ер нь олон улсын жишигт ч Эрүүгийн хуулиас ийм зүйл ангийг хасах, Иргэний хуулиар болон бусад хэлбэрийн зохицуулалтыг хэрэглэн шийдвэрлэдэг болсныг илтгэгчид болон зарим хуульч баримтаар өгүүлж байлаа.
Хэлэлцүүлгийг хөтөлсөн Ерөнхийлөгчийн хуулийн туслах Ж.Баярцэцэг хааж үг хэлэхдээ оролцогсдын саналыг Хэвлэлийн эрх чөлөөний тухай хуулийн төслийг шинэчлэн найруулахдаа тусгах болно гэв.
