Монгол Улсын Ерөнхийлөгч Ц.Элбэгдорж өнөөдөр, ОХУ-ын Элчин сайд Б.А.Говориныг үүрэгт ажлаа дуусгавар болгож байгаатай нь холбогдуулан хүлээн авч уулзлаа.
Ерөнхийлөгч, Элчин сайд Говориныг үүрэгт ажлаа амжилттай дуусгаж байгааг нь дүгнэн ярихдаа “Та өмнө нь Эрхүү мужийн амбан захирагч байх үеэс л манай улс, монголчуудтай ойр дотно хамтран ажиллаж, улмаар Монгол Улсад өөрийн улсаа төлөөлөн Элчин сайдаар ажиллах хугацаанд хоёр орны найрамдалт харилцааг өргөжүүлэн хөгжүүлэх үйлст ихээхэн хувь нэмэр оруулсныг онцлон тэмдэглэхийг хүсч байна. Таныг Элчин сайдаар ажиллах хугацаанд, өндөр дээд хэмжээний харилцан айлчлал хэд хэд болж, олон чухал баримт бичгүүдийг үзэглэн, цаашдын хамтын ажиллагааны шинэ чиглэл салбар бий боллоо. Энэ 2009 он хоёр улс, ард түмний хувьд онцгой үйл явдлаар дүүрэн байлаа. ОХУ-ын Ерөнхийлөгч Д.А.Медведев , Засгийн газрын дарга В.В.Путин, Холбооны зөвлөлийн дарга С.М.Миронов нар тус тус айлчиллаа. Халхын голын хамтын ялалтын 70, УБТЗ-ын 60 жилийн ойн түүхт үйл явдлуудыг улс төрийн өндөр дээд хэмжээнд харилцан тэмдэглэж өнгөрүүллээ. Миний бие Ерөнхийлөгчийн хувиар, анхныхаа гадаад зочноор ОХУ-ын Ерөнхийлөгчийг хүлээн авсандаа их баяртай байна. Манай 2 улс мөнхийн хөршүүдийн хувьд онцгой харилцаатай бөгөөд, цаашид ч олон зууны туршид хадгалагдан ирсэн хамтын ажиллагааны арвин туршлагыг хадгалан, ард түмнийхээ эрх ашигт нийцүүлэн ашиглаж байх нь зүйтэй. Сүүлийн үед харилцаа, хамтын ажиллагааг эдийн засгийн агуулгаар баяжуулах талаар багагүй алхмуудыг хийлээ. Энд Таны биечлэн оруулсан хувь нэмэр их юм” гэлээ.
Элчин сайд Б.А.Говорин, Ерөнхийлөгчийг чухал айлчлалуудаа амжилттай өндөрлөн, цаг зав гарган хүлээн авч уулзаж байгаад талархаж байгаагаа илэрхийллээ. Тэрээр, “ 2009 он манай хоёр орны харилцааны хувьд амжилттай жил байсан гэдэгтэй санал нэг байна. Өндөр хэмжээний айлчлалуудыг амжилттай болоход өөрийн зүгээс хичээл зүтгэл оруулан чармайн ажилласныг үнэлж байгаад баяртай байна. Эрхэм Ерөнхийлөгч таны, манай улсын Ерөнхийлөгч Д.А.Медведевтэй хийсэн нөхөрсөг дотно уулзалт манай 2 орны харилцааны олон асуудлыг шийдвэрлэхэд тус дөхөм болох нь эргэлзээгүй” гэв.
Элчин сайд Б.А.Говоринд МУ-ын Ерөнхийлөгч Ц.Элбэгдорж цаашдын ажилд нь амжилт , эрүүл энхийг хүсэн ерөөлөө.
