Өнөөдөр Монгол Улсын Ерөнхийлөгч Цахиагийн Элбэгдорж Бүгд Найрамдах Хорват Улсаас Монгол Улсад суух Онц бөгөөд бүрэн эрхт элчин сайд Антэ Симоничийн Итгэмжлэх жуух бичгийг хүлээн авлаа.
Дараа нь Монгол Улсын Ерөнхийлөгч БНХУ-ын Элчин сайдтай хоёр орны хамтын ажиллагааны талаар ярилцсан юм. Ноён Антэ Симонич хэлэхдээ, 13 дугаар зууны үед Их Монгол гүрэнд айлчлан ирж ховор нандин тэмдэглэл үйлдэж байсан алдарт жуулчин Марко Поло нь Хорват гаралтай нэгэн байсан бөгөөд тэр цагаас эхлэн манай хоёр орны харилцаа түүхэн улбаатайгаар эхэлсэн гэлээ.
Монгол Улсын Ерөнхийлөгч хоёр орны түүхэн найрсаг харилцаанд сэтгэл өндөр байдгаа өгүүлээд тус оронтой боловсрол, худалдаа, аялал жуулчлал, хөдөө аж ахуйн чиглэлээр хамтран ажиллах хүсэлтэй байгаагаа илэрхийлсэн юм. Мөн 1990 он хүртэл Хорватын Загреб хотноо монгол оюутнууд сурч байсан түүхэн харилцааг сэргээж оюутан солилцооны хөтөлбөрөө үргэлжлүүлэх саналтай байгаагаа хэллээ.
