Монгол Улсын Ерөнхийлөгч Ц.Элбэгдорж Бүгд Найрамдах Хорват Улсын Ерөнхийлөгч И.Иосипович нар өргөтгөсөн хэлэлцээ хийлээ. Монгол Улсын Ерөнхийлөгчийн энэхүү айлчлал нь хоёр улсын харилцаа, хамтын ажиллагааг өргөжүүлэн хөгжүүлэхэд түлхэц өгөхүйц чухал айлчлал болж байна хэмээн санал нэгтэй дүгнэв.
Хоёр орны хооронд дипломат харилцаа тогтоосноос хойшхи 20 жилийн хугацаанд Монгол, Хорватын найрсаг харилцаа, хамтын ажиллагаа манай хоёр ард түмний эрх ашигт нийцэн ардчиллын үнэт зүйлст тулгуурлан хөгжиж байгаад сэтгэл ханамжтай байгаагаа талууд илэрхийлэв.
“2008 онд БНХорват Улсын Ерөнхийлөгчийн Монгол Улсад хийсэн айлчлал манай хоёр орны харилцааг хөгжүүлэх, дээд хэмжээний яриа хэлэлцээний эхлэлийг тавьсан билээ.
Хорват Улс удахгүй Европын холбооны бүрэн эрхт гишүүн болох гэж буйд баяр хүргэе. Монгол Улс, Европын холбооны харилцаа түншлэлийн хэмжээнд хүрч эрчимжиж байна. Энэхүү түүхэн нөхцөл байдал нь манай хоёр улсын харилцааг хөгжүүлэхэд шинэ боломж олгож байна.
Манай улс Европын стандартыг монголд нутагшуулахаар ажиллаж байна. Энэ чиглэлээр та бүхнээс туршлага судлахад дэмжлэг үзүүлэхийг хүсье.
Бидэнд ашигт малтмал, дэд бүтэц, жижиг дунд үйлдвэр, хөдөө аж ахуй, малын эм бэлдмэл, хүнсний бүтээгдэхүүн үйлдвэрлэл, аялал жуулчлалын салбарт хамтран ажиллах боломж бий. Тухайлбал, малын эм, вакцин, урьдчилан сэргийлэх бэлдмэлийг хамтран үйлдвэрлэх болон хамтарч органик бүтээгдэхүүн үйлдвэрлэх замаар хөдөө аж ахуйн салбарт бизнес эдийн засгийн хамтын ажиллагааг дэмжиж болох юм.
Монгол Улс Ардчилсан орнуудын хамтын нийгэмлэгийг даргалж байна. Энэ хугацаанд бид ардчиллыг бэхжүүлэх чиглэлээр үр дүнтэй хамтран ажиллана гэдэгт итгэж байна” хэмээн Ерөнхийлөгч Ц.Элбэгдорж хэлэв.
Ерөнхийлөгч И.Иосипович, монголын талаас тавьж буй саналуудыг дэмжиж байна гэлээ. “Бидний харилцааг хөгжүүлэхэд боловсролын салбарын хамтын ажиллагаа чухал. Манай оронд, олон улсад хүлээн зөвшөөрөгдсөн их дээд сургуулиуд байдаг бөгөөд бид монголын талаас хөдөө аж ахуйн инженер, технологийн чиглэлээр оюутан сургахад бэлэн байна. Түүнчлэн аялал жуулчлалын салбарт хамтарч ажиллах бүрэн боломжтой. Манай улс жил бүр 10 сая жуулчин хүлээн авч байна” гэж тэрээр ярилаа.
Монгол Хорват улсууд сүүлийн жилүүдэд спортын салбарт амжилт олж байгаа. Спортын олон төрлөөр тамирчин бэлдэх, харилцан багш дасгалжуулагч солилцох, монголын тамирчдын олимпийн бэлтгэлийг хорват улсад хийх зэрэг асуудлаар санал солилцож ярилцав.
Хоёр орны ажил хэрэгч хүмүүсийн уулзалтыг харилцан зохион байгуулах нь харилцааны бас нэгэн чухал хэлбэр юм гэдэгтэй санал нэгдлээ. Мөн хоёр орны ард түмний соёлын арга хэмжээг зохион байгуулахыг дэмжиж байгаагаа илэрхийлэв.
Өргөтгөсөн хэлэлцээний дараа Монгол Улсын Ерөнхийлөгч Ц.Элбэгдорж, Хорват Улсын Ерөнхийлөгч И.Иосипович нар хэвлэлийн бага хурал хийж сэтгүүлчдийн асуултад хариулав.
Ерөнхийлөгч Ц.Элбэгдорж хэлэхдээ “Хорват Улс тусгаар тогтнолоо олсны 20 жил, хоёр улсын хооронд дипломат харилцаа тогтоосны 20 жилийн ойтой давхцаж, мөн 2008 онд Хорватын Ерөнхийлөгчийн Монгол Улсад хийсэн айлчлалын үргэлжлэл болж байгаагаараа энэхүү айлчлал онцлог бас түүхэн болж байна. Та бүхэн богино хугацаанд улс орноо хөгжүүлж, амжилт олж байгаад бид бахархаж байна.
Европын орнуудтай харилцаа хамтын ажиллагаагаа өргөжүүлэх нь манай гадаад бодлогын нэг үндсэн чиглэл билээ. Хорват Улс Европын холбоонд гишүүнээр элсэх нь харилцааг хөгжүүлэх бас нэгэн чухал түлхэц юм.
Эрхэмсэг Ерөнхийлөгч И.Иосиповичтой бид хөдөө аж ахуй, уул уурхай, дэд бүтэц, боловсрол, аялал жуулчлалын салбарт хамтын ажиллагааг хөгжүүлэх талаар ярилцлаа.
Хорватын талтай дээд хэмжээнд хийх яриа хэлэлцээ бүхэлдээ үр дүнтэй болж, монгол хорватын ард түмний найрсаг харилцааг бэхжүүлэхэд тус дөхөм үзүүлнэ гэдэгт найдаж байна” гэлээ.
Ерөнхийлөгч И.Иосипович хэлэхдээ, “Монгол Улсын Ерөнхийлөгчтэй бид хоёр орны харилцааг хөгжүүлэх талаар үр дүнтэй яриа хэлэлцээ өрнүүллээ. Ардчилал, хүний эрх, шударга ёс гэх мэт бидний үнэт зүйлс ижил юм. Монгол Улс ардчиллыг бэхжүүлж, эдийн засгаа тогтвортой хөгжүүлж байна. Манай улс мөн эдийн засгаа тогтвортой хөгжүүлж, Европын холбооны бүрэн эрх гишүүн болоход бэлэн боллоо. Бидэнд бүх салбарт харилцаа хамтын ажиллагааг хөгжүүлж, харилцааны түвшинг ахиулах боломж ойрхон харагдаж байна” гэв.
