Ерөнхийлөгч Ц.Элбэгдорж өнөөдөр Хорват Улсын нийслэл Загреб хотноо байх “Ветерина” ХК-ийн “Женера” үйлдвэртэй танилцлаа. 110 жилийн өмнө байгуулагдаж байсан малын эмийн хүрээлэн өнөөдөр 60 гаруй төрлийн малын эм, вакцин, витамин үйлдвэрлэж дэлхийн 25 оронд нийлүүлдэг бүс нутагтаа хамгийн томд орох үйлдвэрлэгч болжээ.
Саяхан Европын Холбоо мал эрүүлжүүлэх бүтээгдэхүүн үйлдвэрлэлийн чиглэлээр тус үйлдвэрт 5 сая еврогийн төсөл хэрэгжүүлэхээр шийдвэрлэсэн байна.
Ерөнхийлөгч Ц.Элбэгдорж уг үйлдвэрт зочлох үеэрээ монголын хөдөө аж ахуйн салбарын чухал асуудлуудын нэг бол малыг эрүүлжүүлэх асуудал юм гээд, монгол малд тохирсон вакцин үйлдвэрлэх, нийлүүлэх чиглэлд хамтран ажиллах талаар үйлдвэрийн удирдлагатай ярилцлаа. Мөн харилцан мэргэжилтэн солилцох талаар ярилцав.
“Ветерина” ХХК-ий удирдлага Монгол бол дэлхийн том зах зээл рүү гарах цэг учраас бизнес эрхлэгчид энэ боломжийг ашиглах учиртай гэдгийг онцлон хэлж, Ерөнхийлөгчийн тавьж буй саналуудыг судлахаар боллоо.
Дараа нь үйлдвэрийн вирус хадгалдаг хэсэг, өндгөн дотор зохиомлоор суулгасн үрээ шалгадаг хэсгийн үйл ажиллагаатай танилцсан юм.
Манай улсад малын эм хэрэгслийг үйлдвэрлэх, худалдан борлуулах зөвшөөрөлтэй 40 гаруй аж ахуйн нэгж байдаг. Төрөөс, малын эрүүл мэндийг сайжруулж, мал эмнэлгийн ажил үйлчилгээг олон улсын жишигт хүргэн, малын гаралтай бүтээгдэхүүнийг гадаад зах зээл рүү гаргах зорилтыг тавиад ажиллаж байна.
