Өнөөдөр Монгол Улсын Ерөнхийлөгч Цахиагийн Элбэгдорж манай улсаас Канад Улсад суух Онц бөгөөд бүрэн эрхт Элчин сайдаар томилогдсон Түндэвдоржийн Залаа-Уулд Итгэмжлэх жуух бичиг гардууллаа.
Итгэмжлэх жуух бичиг гардуулах үеэр Ерөнхийлөгч Ц.Элбэгдорж шинээр томилогдсон Элчин сайдад зарим үүрэг даалгаварудыг өгсөн юм. Тухайлбал, Канад Улс нь манай улстай цаг уурын байдал төстэй учир барилга, ХАА, газар тариалан, эрчимжсэн мал аж ахуйн салбарт хамтран ажиллах бүрэн бололцоо байгааг анхааран ажилдаа тусгаж ажиллахыг зөвлөв. Түүнчлэн Канад Улсын зүгээс Монгол Улсад нэлээд хэмжээний хөрөнгө оруулалт хийж байгаа боловч Засгийн Газрын шугамаар хөгжлийн албан ёсны тусламж олгох нь бага, монгол оюутнуудад тэтгэлэг олгохгүй байгаа зэрэг байдлыг өөрчлөн хоёр орны харилцааг шинэ шатанд гаргахад Элчин сайд хичээн ажиллах ёстойг анхааруулав.
Т.Залаа-Уул нь Москва, Каирын Дипломат академи, АНУ-ын Нью-Портын Олон улсын эрх зүй судлалын батлан хамгаалахын институтэд тус тус мэргэжил дээшлүүлсэн. “Онц бөгөөд Бүрэн эрхт элчин сайд” цолтой, румын, орос, англи хэлтэй.
