ОРОСЫН ХОЛБООНЫ УЛСЫН ЕРӨНХИЙЛӨГЧ ЭРХЭМСЭГ НОЁН Д.А.МЕДВЕДЕВ ТАНАА
Москва хот
Эрхэм хүндэт Дмитрий Анатольевич,
Монгол Улс, Оросын Холбооны Улсын хооронд дипломат харилцаа тогтоосны 90 жилийн ойг тохиолдуулан Монголын ард түмний өмнөөс болон хувиасаа Танд, Танаар уламжлан найрсаг Оросын ард түмэнд чин сэтгэлийн халуун баяр хүргэе.
Монгол Улс, Оросын Холбооны Улсын хооронд дипломат харилцаа тогтоосноос хойшхи 90 жилийн хугацаанд хоёр улсын харилцаа, хамтын ажиллагаа түүхэн сорилтыг амжилттай даван туулж, Таны 2009онд Монгол Улсад хийсэн төрийн айлчлалын үеэр тохиролцсоны дагуу манай хоёр улсын харилцаа стратегийн түншлэлийн түвшинд хүрч, эдүгээ улс төр, эдийн засаг, соёл, боловсрол, эрүүл мэнд, батлан хамгаалах, хүмүүнлэгийи зэрэг бүхий л салбарыг хамран шинэ агуулга, хэлбэрээр баяжин улам өргөжин хөгжиж байгаад сэтгэл нэн ханамжтай байна.
Энэ 2011 онд миний ОХУ-д хийсэн албан ёсны айлчлалын үеэр Та бид хоёр Монгол Улс, Оросын Холбооны Улсын хоорондын уламжлалт найрсаг харилцаа, олон талт хамтын ажиллагааг бүх талаар өргөжүүлэн хөгжүүлэх үүднээс олон асуудлыг ярилцаж, тохиролцсон бөгөөд энэхүү харилцаа, хамтын ажиллагааг өргөжүүлэн хөгжүүлэхэд Таны оруулж буй хувь нэмэр асар их билээ.
Монгол, Оросын найрамдалт харилцаа, хамтын ажиллагаа нь түүхэн хөгжил, цаг үеийн шаардлагад нийцэн улам өргөжин дэвжинэ гэдэгт итгэл төгс байна.
Энэхүү завшааныг ашиглан Эрхэмсэг ноён Ерөнхийлөгч Танд эрүүл энх, ажлын амжилт, найрсаг оросын ард түмэнд хөгжил цэцэглэл, сайн сайхан бүхнийг хүсэн ерөөе.
Гүнээ хүндэтгэсэн,
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2011 оны 11 дүгээр сарын 05
Улаанбаатар хот
