Монгол Улсын Ерөнхийлөгчийн санаачлан боловсруулсан “Хэвлэл мэдээллийн эрх чөлөөний тухай” хуулийн төслийг УИХ-д өргөн барихтай холбогдуулан Ерөнхийлөгчийн Тамгын газраас “Иргэний танхим”-д өнөөдөр хэвлэлийн бага хурал хийлээ. Хэвлэлийн бага хуралд Ерөнхийлөгчийн зөвлөх Ч.Сосормаа, Ерөнхийлөгчийн хуулийн туслах Ж.Баярцэцэг нар хуулийн төсөл, түүний ач холбогдол, шинэлэг зүйл заалтуудын талаар сэтгүүлчдэд тайлбарлав.
-Хуулийн төслийг боловсруулахдаа хэвлэл мэдээллийн байгууллагуудын ил тод, чөлөөт, хараат бус байдлыг баталгаажуулахад анхаарлаа. Төслөө Монгол Улсын Ерөнхийлөгчийн дэргэдэх “Иргэний танхим”-аар олон удаа хэлэлцүүлж, олон улсын байгууллагын санал зөвлөмж, гадаад орнуудын туршлагын судалгаа болон Монголын хэвлэл мэдээллийн байгууллага, сэтгүүлчид, эрдэмтэн судлаачид, холбогдох мэргэжлийн байгууллагуудын санал, дүгнэлтийг авч тусгасан. Сэтгүүлчид, хэвлэл мэдээллийн байгууллагынхны дунд хариуцлагатай, ил тод байх хөдөлгөөн ч бий боллоо. Тиймээс энэ хууль гарснаар хэвлэл, мэдээллийн байгууллагынхны өөрчлөлт шинэчлэлд хувь нэмрээ оруулах болно гэж бодож байна хэмээн Ерөнхийлөгчийн зөвлөх Ч.Сосормаа онцлон тэмдэглэлээ.
Ерөнхийлөгчийн хуулийн туслах Ж.Баярцэцэг хуулийн төслийн болон түүнтэй нийцүүлэн бусад хуульд оруулах өөрчлөлтийн талаар тодруулж мэдээлээд сэтгүүлчдийн асуултад хариулав. Тухайлбал, Эрүүгийн хуулийн доромжлох, гүтгэх гэсэн зүйл заалтыг хасах, өөрчлөхтэй холбогдуулж “Нэр төр, алдар хүнд”-ийг хэрхэн зааглаж ойлгох вэ, улс төрчид ард нь нуугдсан хэвлэл мэдээллийн байгууллагыг төрийн мэдлийн хэвлэл мэдээллийн хэрэгслийг хориглох гэдэгтэй яаж уялдуулж болох вэ, эх сурвалжаа тодорхой нөхцөлд илчлэх заалт оруулсан уу, хэвлэл мэдээллийн зөвлөлийг хэрхэн байгуулах вэ гэхчлэн сэтгүүлчид асууж байв. Эдгээр асуултад тэрээр хариулахдаа “Нэр төр бол хүн бүхэнд төрөхөд нь бий болдог. Тиймээс эрүүгийн хуулийн заалтыг дэлхий нийтийн жишигт нийцүүлэх үүднээс өөрчлөхдөө “хүний нэр төрийг олон нийтэд гутаан, хохирол учруулсан бол гүтгэх гэмт хэрэгт тооцон, алдар хүнд, ажил хэргийн нэр хүндийг гутаасан бол иргэний хэргээр шийдвэрлэгдэх, ингэхдээ алдар хүнд нь гутаагдсан гэж үзэж буй нэхэмжлэгч этгээд нотлох баримтаа шүүхэд гаргах зохицуулалтыг орууллаа.
Төрийн мэдлийн хэвлэл мэдээллийн хэрэгсэл гэж төрийн байгууллага, төрийн өмчит болон төрийн өмчийн оролцоотой хуулийн этгээд төсвийн мөнгөөр сонин, телевиз, радио байгуулан ажиллуулахыг хэлнэ. Өөрөөр хэлбэл ингэхийг хуулиар хориглосон гэсэн үг. Харин улс төрчид ард нь байгаа гэдэг асуудлыг зохицуулах үүднээс үүсгэн байгуулагч эзэд, хувь эзэмшигч, хөрөнгө оруулагчдыг жил бүр, өөрчлөлт орсон тухай бүр олон нийтэд ил тод мэдээлэх заалт оруулсан. Мэдээллийн эх сурвалж гэдэг бол хэвлэл мэдээллийн байгууллагын хамгийн чухал нууцлах зүйл тул илчлэх тодорхой нөхцөлийг тусгаагүй. Харин хуулийн байгууллага эх сурвалжаа илчлэхийг шаардан дарамт шахалт үзүүлэхийг хориглосон байгаа. Зөвлөл бол хэвлэл мэдээллийн өөрийн нь сайн дурын байгууллага. Тиймээс нарийвчлан заагаагүй. Нарийн асуудлуудыг сэтгүүлчид, хэвлэл мэдээллийн байгууллагууд өөрсдөө хурлаараа шийдвэрлэнэ хэмээн үзэж байна” гэв.
